ग्यास बम’ दयेकीम्ह घिमिरे विरुद्ध मुद्दा

सुनसरी (झीगु स्वनिगः)

असुरक्षित ग्यास मियाः छेँ - छेँय् 'ग्यास बम' थ्यंकीम्ह सुगम ग्यास कम्पनीया शिवप्रसाद घिमिरेयात जिल्ला प्रशासन ज्याकुथिं कारबाही यायेगु नितिं आलटाल यायेवं घरेलु लिसे साना उद्योग ज्याकू सुनसरीं मुद्दा न्ह्याकीगु जूगु दु । पब्लिक फोरम विराटनगरं बिहीबाः घरेलु लिसे साना उद्योग ज्याकू सुनसरीइ उजुरी बिइधुंकाः अधिकृत रमानाथ शर्मां व्यापारी घिमिरेयात हदैतक्कया कारबाही याइगु जानकारी बियादिल ।
प्रमुख जिल्ला अधिकारी रामप्रसाद थपलियां व्यापारी घिमिरेयात कारबाही यायेत आलटाल याःगु धासें पब्लिक फोरमं उजुरी ब्यूगु खः ।

उपभोक्ता संरक्षण ऐनकथं कारबाही यायेत, बयान कायेगु व मुद्दा तयेगु अधिकार क्वःछीनातःगु निरीक्षण अधिकृतयात जक दइ । उजुरीया नितिं पियाच्वनागु खः । सुनां नं उजुरी मबियाः मुद्दा चलय् यायेत थाकुयाच्वंगु दु, आः लँपु चाल । जीउ ज्यान काइगु घटना जूगुलिं यानाः सरकारी वकिललिसेया परामर्शया हदैतक्क कारबाही जुइकथं मुद्दा चलय् यायेगु जुइ - शर्मां धयादिल । वय्कलं आम जनचासोया विषय जूगुलिं यानाः याकनं हे मुद्दा चलय् यायेगु जानकारी बियादिल । घिमिरेयात उजुरीया आधारय् उपभोक्ता संरक्षण ऐन २०५४ कथं मुद्दा चलय् यायेफइ ।

थ्व ऐन कथं अभियुक्तयात अधिकतम न्यागू लखतक्क जरिवाना व झिप्यदँतक्क कैद वा निगुलिं जुइफुगु व्यवस्था नापं दु । प्रमुख जिल्ला अधिकारी थपलियां धयादी सरकारी वकिलं आःतक्क लिखित परामर्श उपलब्ध मयानिगुलिं यानाः कारबाही प्रकि्रया न्ह्यःने न्ह्याकेमफुगु जानकारी बियादिल । अनुगमन टोलीं व्यापारी घिमिरेया सुनसरी खनारया नेपाः पेट्रोलियम ट्रेड न्ह्याग्गु नं इलय् मुयाः वयेफुगु सिलिण्डर व फुटरिङ छवाः न्ह्यः जफत याःगु खः । सुगम ग्यासया मुख्य ज्याकू धादिङय् दुगु घिमिरें मेमेगु ग्यास कम्पनीया ग्यास खुयाः सुनसरी खनारय् गःपः व ब्वहलय् थःगु कम्पनीया लोगो तयाः मीगु यानाच्वंगु अवस्थाय् अनुगमन टोलीं जफत याःगु खः ।

More Stories Like this