लादेन हत्याया मुद्दा अन्तराष्ट्रिय न्यायालयय्
अलकायदाया प्रमुख ओसामा विन लादेनया हत्याया मुद्दायात आः अन्तर्राष्ट्रिय फौजदारी अदालतय् यंकीगु जूगु दु । लादेनया प्यम्हम्ह काय् ओमार ओसामा विन लादेनं थः बौयात निहत्या व निशस्त्र अवस्थाय् नं ज्वनाः कानुनी प्रकृया मन्ह्याकुसे छेनय् गोलीं कयेकाः स्यानाव्यूगुया औचित्यता सावित यायेत अमेरिकी राष्ट्रपति बाराक हुसेन ओबामायात लच्छिया अल्तिमेटम व्यूगु दु । उगु घटनाया शत्य तथ्य अनुसन्धान यानाः मनासिव कारण न्ह्यःने हयेत छगू कथंया हाथ्या व्यूगु दु । थुकियात अमेरिकी राष्ट्रपति ओवामां छुगुगुकथं कयाः लिसः वीगु खः धायेमफु । वंगु मेया २ तारिख खुन्हु अमेरिकी राष्ट्रपति ओबामाया आदेशय् लादेन च्वनाच्वंगु छेँय् ४० मिनेटया दुने सैनिक आक्रमण यानाः लादेनयात स्यानाः लाशनापं सैनिकतय्सं यंकूगु खः । लाश च्याका छ्वये धुंकूगु धयाच्वंसां लादेनया परिवारं लादेन हत्याया ठोस प्रमाण वीत नं इनाप याःगु दु ।
लादेनयात स्याये धुंकाः छेंजःपिन्त लाश मविसे अमेरिकी सैनिकतय्सं हे छाय् ज्वना वन ? छेँजः पिनिगु अनुपस्थितिइ छाय् लाश च्याकाः छ्वल ? छम्ह मुस्मांयात स्याये धुंकाः इमिगु धार्मिक आस्था व संस्कारकथं छाय् अन्त्येष्टि याके मविल ? १० दँ तक्क अमेरिकायात घों लानाः ३० खर्ब डलर खर्च याकूम्ह लादेन सीधुंकाः नं अमेरिका लाश खनाः ग्याःगु जक मखुला ? लादेनया छेँजःपाखें वयकःया काय् ओमारं न्यूयोर्क टाइम्सय् पिहां वःगु छगू प्रेस विज्ञप्ति पिकयाः थ्व खँ सार्वजनिक यासे थः बौया हत्याय् अमेरिका व अमेरिकी राष्ट्रपति ओबामां न्याय् यायेमफुगु जक मखु फुक्क कानुनी राज्यया अवरधारणायातहे चुंचुं यानाव्यूगु कथं काःगु दु । छम्ह निहत्या व निशस्त्र व्यक्तियात कानुनया प्रकृयाय् मयंकुसे घटनास्थलय्हे स्याकेगु राष्ट्रपतिया अर्डर न्यायसंगत मजूगु खँय् विवाद मदु ।
लादेनया काय् ओमारं लच्छिया अल्टिमेटम व्यूगु दु व उगु अवधीया दुने अमेरिकी राष्ट्रपति ओबामां लादेनयात स्यायेगु अर्डर वियाः कानुन व न्यायया मिखां "अपराध" मखु धकाः प्रमाणित यायेत वंगु वा वनीगु दवावयात छु गुकथं काइगु खः, धायेमफु । तर उगु अवधिया दुने राष्ट्रपति ओबामां उचित लिसः मविल धाःसा लादेनया हत्याया केश अन्तराष्ट्रिय अदालतय् वनीगु निश्चित खनेदु । सुनां कल्पनाहे मयाःगु उगु घटना लिपा सृजना जूगु थुगु अवस्थां अमेरिकाया साम्रज्यवाद व वं कयाच्वंगु सैनिक कार्यवाही आः अन्तराष्ट्रिय न्यायालय् वहसया विषय जूवनी पक्का पक्की खनेदु । थुकिं विश्व न्यंक अमेरिकाया साम्राज्यवादया मानवअधिकार, स्वतन्त्रता व न्यायीक अवधारणाया वास्तविक रुपरेखा विश्वया न्ह्यःने छर परस्त जुइगु ज्या खँयात आः सुनां पनेमफैगु निश्चित खः ।
More Stories Like this
पार्टी एकता छुकिया नितिं ? चिकंया भाः कुहांवलं नं नेपालय् छाय् लागू मजूगु ? संघर्ष समितियात सक्रिय याये थौं मजदुर दिवस जातीय पहिचानयात कयाः दलतय्गु दथुइ सहमति
