सरकार असफल मखु : झलनाथ
येँ (झीगु स्वनिगः)
प्रधानमन्त्री झलनाथ खनालं थःगु नेतृत्वया सरकारया राजिनामा फ्वनाः प्रतिपक्षं हनिमुन हंकेमव्यूगु द्वपं वियादीगु दु । एमालें सुनसरी न्ह्याकूगु शान्ति व संविधानया नितिं जनजागरण अभियानयात म्हिगः इनरुवाय् जूगु छगू ज्याझ्वलय् नवानादिसें प्रधानमन्त्री खनालं सरकार विस्तार यायेगु खँय् छुं लिवाःगु खँ स्वीकार यानादीगु खः । मेमेगु सरकार दच्छिया अवधि हमिमून मानय् याइसा, थःपिन्त सच्छि न्हि मदुवलय् निसें राजिनामा फ्वनेगु ज्या यानाः गलत संसदीय विकृति न्ह्यःने हःगु धयादीगु दु । स्वला सरकार गठन व विस्तारय्हे फुत । वयकःया धापू खः ।
वयकःनं जेठ १४ या दुने संविधान दयेकेगु सम्भव मदुगुलिं हे म्याद थपय् यायेगुया विकल्प मदुगु धयादीगु खः । अवधि दच्छिया प्रस्ताव सरकारयागु जूसां थप जुइफूगु व सकसिगु सहमति कयाः ई म्हो यायेफैगु नं प्रधानमन्त्री खनालं कुलादीगु खः ।
