फोरमं हे सरकार दयेकीगु

न्हूगु सरकारया स्वरुप बारे माओवादीलिसे वार्ता

सरकार गठनया नितिं एमाले व कांग्रेसं यानाच्वंगु कुतःयात ध्याकुनय् लाकाः मधेशी जनअधिकार फोरमं थःगु हे नेतृत्वय् सरकार गठन यायेगु निर्णय याःगु दु । म्हिगः चान्हय् लिबाक तक च्वंगु फोरमया केन्द्रीय बैठकं उगु निर्णय याःगु खः ।

फोरमया नेतृत्वय् सरकार गठन यायेगु नितिं माओवादीं सकारात्मक सन्देश छ्वया हयेवं हे फोरमं थःगु नेतृत्वय् सरकार दयेकेगु निर्णय याःगु खः ।

फोरमं आः पार्टी अध्यक्ष उपेन्द्र यादवया अध्यक्षताय् सरकार दयेकीगु अनुमान दु । तर थुकिया बारे आधिकारिक निर्णय धाःसा मजूनिगु खँ फोरमया छम्ह नेतां धाःगु दु ।
फोरमया नेतृत्वय् सरकार दयेकेगु बारे नेकपा माओवादी नं तयार दुगु खँ धाःगु दु । फोरमं थःगु हे नेतृत्वय् सरकार दयेकेगु निर्णय यायेवं थौं माओवादी केन्द्रीय सचिवालयया बैठक च्वनाः उकिया बारे गृहकार्य यानाच्वंगु खँ सीदुगु दु ।
फोरमया नेतृत्वय् सरकार दयेकेगु बारे थौं सुथय् माओवादी व फोरमया शीर्ष नेतातय् दथुइ सहलह जूगु दु । उगु सहलहय् मेगु छु छु पार्टीयात थःगु पक्षय् हये फइ धइगु बारे नं गृहकार्य याःगु खः ।

फोरमया थःगु हे नेतृत्वय् सरकार दयेकेगु बारे गच्छेदार पुचः नं सहमत जूगु खँ धाःगु दु । अथे खःसां फोरम व माओवादी दथुइ जूगु वार्ताय् विजय गच्छेदार पक्ष धाःसा मवं ।

उखे फोरमं थःगु नेतृत्वय् सरकार दयेकेगु आधिकारिक निर्णय यायेवं कांग्रेस सभापति गिरिजाप्रसाद कोइरालां फोरमया वरिष्ठ नेता विजयकुमार गच्छेदारयात थःगु निवासय् सःताः खँल्हाबल्हा यानादीगु दु । उगु इलय् भाजु कोइरालां थःपिनि गठबन्धनयात गच्छेदार पुचलं ग्वाहालि यात धाःसा गच्छेदारयात उपप्रधानमन्त्री बीगु आश्वासन बियादीगु खँ धाःगु दु ।

कांग्रेस-एमाले गठबन्धनय् आः २८६ सीट दुगु व यदि गच्छेदारं फोरमयात तछ्यानाः २० म्ह सभासद ज्वना वल धाःसां कांग्रेस-एमाले गठबन्धनया सरकार बने जुइ धासें उकियात ग्वाहालि यायेत वयकलं गच्छेदारयात इनाप यानादीगु खः । गच्छेदारं थ्व बारे पासापिंलिसे खँ ल्हानाः लिसः बी धकाः कोइरालायात धया थकूगु दु । कोइरालां गच्छेदारयात पार्टी हे तछ्यानाः जूसां पिहां वा धयादीगु खँ नं सूत्रं कंगु दु । सूत्रया कथं कोइरालां आश्वासन बिउसां नं गच्छेदार पुचः पार्टी हे तछ्यानाः एमाले-कांग्रेस गठबन्धनय् वनेगु मनस्थितिइ धाःसा मदु ।

अथे हे फोरमया नेतृत्वयात सद्भावना आनन्ददेवीया निम्ह सभासद्तय्सं नं समर्थन याःगु खँ सीदुगु दु । सद्भावनाया सरिता गिरीया लिसें मेम्ह छम्ह सभासद् फोरम पक्षय् दुसा राजेन्द्र महतो एमाले गठबन्धनया पक्षय् दु । फोरमयात दलित जनजाति पार्टीं नं समर्थन याःगु दु ।

आः माओवादीया २३८ फोरमया ५३ दलित जनजाति पार्टी व सद्भावना पार्टीया निम्ह यानाः मुक्कं २९४ सीट खायेधुंकूगु दुसा फोरमया नेतृत्वय् सरकार वइगु जुइवं सद्भावना व तमलोपां नं फोरमयात हे समर्थन याइगु संकेत वयेधुंकूगु खँ फोरमया नेता उपेन्द्र झां सन्ध्या टाइम्सयात कनादिल ।