बन्दं देय्न्यंकं जनजीवन प्रभावित

सलंसः जनजातिया नेता-कार्यकर्ता गिरफ्तार

नेपाल आदिवासी जनजाति आन्दोलन राष्ट्रिय मोर्चाया आह्वानय् जूगु थौंया नेपाल बन्द देय्न्यंकं शान्तिपूर्ण जूगु दु। बन्द आह्वान यानातःगुलिं सार्वजनिक यातायात, शिक्षण संस्था, व शहरया मूमू बजाः बन्द जूगु दु। मोर्चाया मू घटक जनजाति महासंघया महासचिव आङकाजी शेर्पां बन्द शान्तिपूर्ण रुपं सफल जूगु दावी यानादीगु दु ।

क्वःछिना तःगु इलय् हे न्हूगु संविधान जारी यायेमाःगु, पहिचानया आधारय् राज्यया पुनर्संरचना यायेमाःगु, जातीय स्वायत्तता, स्वशासनया अधिकार सुनिश्चित जुइमाःगु माग यासें थ्व बन्द आह्वान याःगु खः। थौं सुथय् प्रदर्शन याःपिं सलंसः जनजाति नेता कार्याकर्तातय्त प्रहरीं ज्वंगु दु। सुथय् जनजाति महासंघया उपाध्यक्ष डोजाङ शेर्पा, सचिव अर्जुन याक्खा, कोषाध्यक्ष डेकेन्द्र राई नापं २५ म्हं मल्याक प्रदर्शनकारीत ज्वंगु दु। अथे हे कलंकीं नेपाल मगर महिला संघया महासचिव पूर्णमाया तुलामी, कोषाध्यक्ष पद्म आलेमगर, मजदुर नेता जगत मगर नापं ३० म्ह ज्वंगु दु। चाबही, पुतलिसडक, रत्नपार्क नापं थाय्थासं नं दर्जनौं नेता कार्यकर्तात ज्वंगु दु।

थ्वहे दथुइ नेपाल आदिवासी जनजाति महासंघया अध्यक्ष राजकुमार लेखीं छगू विज्ञप्ति पिथनाः बन्द ताःलाकेत सतकय् वंपिं द्वःछिम्ह कार्यकर्तातय्त प्रहरीं ज्वंगु दावी यानादीगु दु। बन्द थौं बहनी ६ बजे तक जुइगु खँ नं महासंघं धाःगु दु ।

वार्ता अस्वीकार
आदिवासी जनजातिय्सं याःगु नेपाल बन्दया अन्तिम ई म्हिगः बहनी साढे १० बजे फोन यानाः सरकारं वार्ताया नितिं याःगु इनापयात आन्दोलनकारीतय्सं अस्वीकार याःगु दु। जनजाति महासंघया महासचिव आङकाजी शेर्पां थःपिं बन्दया अन्तिम अवस्थाय् थ्यनेधुंकूगुलिं चान्हय् वार्ता याये धाःगुलिं थःपिंसं उकियात अस्वीकार यानागु खँ कनादिल ।

बन्द विरुद्ध र्‍याली
बन्दकारीतय् मागयात समर्थन तर बन्द धाःसा विरोध धासें पर्यटन लगायत व्यवसायीतय्सं थौं सुथय् ठमेलं छगू मोटरसाइकल र्‍याली पिकयाः तिंख्यः लागा चाःहिल। आवंलि न्ह्याम्हेस्यां हे बन्द याःसां नं थःपिंसं उकिया विरोधय् थथे हे र्‍याली पिकायेगु खँ नं व्ययसायीतय्सं धाःगु दु। सभाय् भाष्करराज राजकर्णिकार, सुमन पाण्डें न्ववानादीगु खः ।