गज्याःगु राष्ट्रिय सरकार दयेकीगु?
संविधान जारी यायेगु धकाः बियातःगु न्हि वयेत १५ न्हु जक ल्यं दनिबलय् राजनीतिक पार्टीतय् दथुइ हानं 'राष्ट्रिय सरकार' गठन यायेगु तयारी न्ह्याःगु दु। वर्तमान सरकारया विकल्प कथं राष्ट्रिय सरकार गठन यायेगु धकाः दलया शीर्ष नेतातय् दथुइ नं तीव्र रुपं संवाद शुरु जूगु दु ।
आः संविधान पित बीगु धकाः घोषणा यानातःगु न्हि वयेत बाःछि जक ल्यं दनि। तर संविधान पिहां वइगु खः लाकि मखु, वःसां गय् यानाः वइ, संविधानसभाया भविष्य छु जुइगु खः धइगु खँ आः तक निश्चित मजूनि। उकिं थ्व ई धइगु ला थुगु विषयलय् धकाःसा खँल्हाबल्हा यायेमाःगु ई खः। तर राजनीतिक पार्टीया नेतात संविधान व संविधानसभा थेंज्याःगु महत्वपूर्ण खँय् संवाद यायेगु त्वःताः सरकार परिवर्तन थेंज्याःगु विषयय् केन्द्रित जुयाच्वंगु दु। थ्व उमिगु पदप्रतिया लोभया चरम अभिव्यक्ति खः ।
थ्व इलय् उमिसं धयाच्वंगु राष्ट्रिय सरकार नं वास्तवय् देशय् तःक्वःमछि असफल जुइधुंकूगु एजेण्डा खः। आः हानं वहे जुइ मफइगु एजेण्डायात न्ह्यःने हयाः थ्व पार्टीतय्सं वास्तवय् यायेत्यंगु छु खः? राष्ट्रिय सरकार धायेसातकि फुक्कं पार्टी उकी दुथ्यायेमाल। फुक्कं पार्टी दुथ्याइबलय् उकिया नेतृत्व स्वतः तःधंगु पार्टीया ल्याखं माओवादीं याये माःगु जुल। माओवादीया नेतृत्वय् दयेकीगु सरकारय् कांग्रेस वयेत आः तक नं तयार मजूनि। अले गय् यानाः सम्भव जुइ राष्ट्रिय सरकार? थथे सम्भव हे मदुगु खँयात छाय् हानं थौंया महत्वपूर्ण इलय् न्ह्यःने हयाच्वन? अले थ्व हानं गुगुपती षडयन्त्रया ब्व खः? नेतातय्त जनताया न्ह्यसः दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
