पाकिस्तानय् तालिवानीतय् आत्मघाति बम आक्रमण, ७३ सित

बिन लादेन स्याःगु बदला : तालिवान

पाकिस्तानया छगू अर्धसैन्य प्रशिक्षण केन्द्रय् जूगु बम आक्रमणय् ७३म्ह मनूत सीगु दु ।

उत्तर पश्चिमी पाकिस्तानय् लाःगु साबकदारय् दुगु उगु अर्धसैन्य प्रशिक्षण केन्द्रय् निगू आत्माघाति बम बिष्फोट जूगु खः । बम हमलाय् ७३म्ह सीगु दुसाः १०० मल्याक मनूत घाःपाः जूगु दु । सीपि अधिकांश मनूत अर्धसैन्य अधिकारीत जूगु खँ धाः दु ।

मोटरसाइकलय् वःपिं आक्रमणकारीतय्सं शुक्रवाः सुथसिया ५:५५ बजे न्हापांगु बम आक्रमण या:गु खःसा उगु हमलाया च्यागू मिनेट लिपा मेगू बम आक्रमण या:गु खः । बम हमलाय् निगः सवारीसाधन व नीगू पसःत नं क्षतिग्रस्त जूगु दु ।

पाकिस्तानी तालिबानं थुगु आक्रमणया जिम्मा काःगु दु । तालिबानं अल कायदा प्रमुख ओसामा बिन लादेनयात स्याःगु विरोधय् आक्रमण याःगु खँ धाःगु दु । तालिवानं लादेनयात स्याःगु विरुद्ध याःगु थ्व न्हापां आक्रमण जूगु खँ धाःगु दु । लादेनयात वंगु मे २ तारिख कुन्हु पाकिस्तानया अबोत्ताबादय् अमेरिकी सैनिकतय्सं स्याःगु खः ।

More Stories Like this