लादेनयात स्यायेधुंकाः विश्व झन तनावपूर्ण

अन्तर्राष्ट्रिय आतंकवादी धयातःम्ह ओसामा बिन लादेनयात पाकिस्तानया एबोटावादय् सुलाच्वंगु अवस्थाय् अमेरिकी सेनां स्याना बीवं पाण्डोराया बाकस चायेके थें अनेक कथंया न्ह्यसः पिदंगु दु। थ्व मामिलाय् दकलय् अहम् न्ह्यसः पिहां वःगु दु, बिन लादेन पाकिस्तानय् सुलाच्वंगु खःसा उकिया जानकारी पाकिस्तानं छाय् मबिल? गनं पाकिस्तानं ओसामा व ओबामा निगुलिंयात ठिक्क जुइ कथंया 'डबल स्टाय्ण्डर्ट' नीति जकं ज्वनाच्वंगु मखु ला?

छखे थ्व न्ह्यसः दुसा मेखे सुं छम्ह अमुक मनूयात ज्वनेगु नामय् मेगु देशया सार्वभौमिकतायात हे वास्ता मयासे अमेरिकां पाकिस्तानय् थःगु सेना छ्वये जिउ ला? उकिया लागिं पाकिस्तानया अनुमति कायेमाः लाकि म्वाः?
उकिया नापं मेगु छगू नं न्ह्यसः पिहां वःगु दु, अमेरिकी सेनां आक्रमण याः वंबलय् बिन लादेन निःशस्त्र हे च्वनाच्वंगु खः। अज्याःम्ह निशस्त्र मनूयात ज्वनेगु ज्या मयासे छाय् अन हे स्यायेगु ज्या यात? थुकिं लादेन ति हे अमेरिका नं हिंस्रक व खतरनाक खः धइगु खँ मक्यं ला?
थ्व खास यानाः अज्याःगु न्ह्यसःत खः गुकिया लिसः बीगु लागिं छुं अनुसन्धान यानाच्वनेम्वाः। थ्व सम्बद्ध देय्तय्गु नैतिकतालिसे स्वानाच्वंगु विषय खः। उकिसनं लादेनयात स्यायेधुंकाः वयागु अल-कायदां याइगु आतंकवादी कारवाही बन्द जुइला धइगु मेगु अह्म न्ह्यसः ला ल्यं हे दनि।
थुपिं फुक्क न्ह्यसःतय्सं लादेन धुंकाःया विश्वयात अझ तनावपूर्ण, अझ आतंकपूर्ण याना बीगु संकेत धाःसा बियाच्वंगु दु। मुख्य थुइकेमाःगु खँ थन सुलाच्वंगु दु ।

More Stories Like this