शान्ति प्रक्रियाया प्रस्ताव तयार
प्रधानमन्त्री नेपाः थ्यनेवं हे दलतय्त न्ह्यब्वइगु
येँ (सन्ध्या टाइम्स)/प्रधानमन्त्री झलनाथ खनाल टर्कीं लिहां वयाः नेपाः थ्यनेवं हे आः वइगु जेठ १४ गते न्ह्यः हे पूवंकेमाःगु शान्ति प्रक्रियाया सम्बन्धी ठोस प्रस्ताव न्ह्यःने तइगु खँ सीदुगु दु।प्रधानमन्त्री ज्याकुथी च्वनीम्ह बिना विभागीय मन्त्री घनश्याम भुषालं थुकिया जानकारी बियादीगु खः ।
आः सरकारं पेश याइगु शान्ति प्रक्रिया सम्बन्धी थ्व प्रस्ताव थुलि ठोस जुइ कि उकियात नेपाली कांग्रेसं नं स्वीकार याइ व वयां लिपा कांग्रेसयात नं वर्तमान सरकारय् दुहां वयेगु लुखा चालीगु दावी वय्कलं यानादीगु दु। तर प्रधानमन्त्री खनालं प्रस्तुत याइगु उगु प्रस्ताव गज्याःगु खः धइगु खँ धाःसा वय्कलं कनामदी।देशय् हानं सरकारया विकल्प मालेगु ज्या न्ह्यानाच्वंगु सन्दर्भयात कयाः न्ववासें वय्कलं थ्व सरकार शान्ति व संविधानया सवालय् छुं ज्या याये धकाः वःगु खः, यदि छुं हे याये मफुत धाःसा मेपिंसं चीके हे म्वाः, थःपिं हे चिला वनेगु जुइ धकाः नं वय्कलं धयादिल ।
थ्वहे झ्वलय् मेगु छगू सूत्रं बिउगु जानकारी कथं नेपाली सेनापाखें छुं ई न्ह्यः सेना समायोजन सम्बन्धी प्रस्तावयात हे आः सरकारं ठोस प्रस्तावया रुपय् न्ह्यब्वयेत्यंगु खः। नेपाली सेनां देशय् दुगु स्वंगुलिं सुरक्षा निकाय व माओवादीया लडाकु सेमत तयाः न्हूगु हे फोर्स गठन याये फइ धइगु छगू प्रस्तावयात सरकारयात बिउगु खःसा उगु प्रस्तावयात माओवादीं नं स्वीकार यायेधुंकूगु दु। आः निगुलिं सरोकारवाला पक्षया दथुइ सहमति जूगु आधारय् सरकारं उकियात हे आधिकारिक प्रस्ताव दयेकाः प्रस्तुत यायेत्यंगु खः। सरकारं न्ह्यब्वइगु प्रस्तावयात नेपाली सेना व माओवादीं स्वीकार यायेवं शान्ति प्रक्रियाया लँपु सुचारु जुइगु व संविधान दयेकेगु ज्या अःपुया वनीगु अनुमान याःगु दु ।
सरकारं पेश याइगु प्रस्तावयात सेना व माओवादीं स्वीकार यायेवं मेगु राजनीतिक पार्टीत नं स्वीकार यायेत बाध्य जुइमालीगु खँ नं धाःगु दु। थ्व प्रस्तावयात निगुलिं पक्षं स्वीकार यायेवं शान्ति प्रक्रियायात कयाः मेमेगु पार्टीं माओवादीयात यानाच्वंगु आशंका नं चिला वनीगु खँ धाःगु दु ।
सेनाया प्रस्तावय् माओवादीया ग्वःम्ह सेना समायोजन यायेगु धइगु खँय् विवाद जुइगु अनुमान न्हापा यानातःगु खःसां आः सेनाया संख्या सम्बन्धी खँय् नं सहमति जुइधुंकूगु दावी सूत्रं याःगु दु। थ्व प्रस्तावं सरकार नं बचे जुइगु अनुमान दु ।
