उदाय् मुना

माधवरत्न ख्वबि

वंगु वैशाख ३ गते शनिवाः कुन्हु येँया भृकुटीमण्डपय् उदाय् समाजया ग्वसालय् सकल उदाय्तय्गु भेला कथं छगू उदाय् मुना ज्याझ्वः जुल। उदाय् समाजया नायः डा. रुपज्योति कसाःया सभापतित्वय् न्ह्याःगु उगु ज्याझ्वलय् स्थापित खलकं पिथंगु वहःया पाँय्म्वःया उलेज्या नं जूगु खः ।

ज्याझ्वलय् उदाय् दुनेया थीथी जातिया थःथःगु जातीय लजगाः कथंया ज्याझ्वःत ब्वयातःगु खः। उदाय् समाजय् सुलाच्वंगु थीथी ज्या व सीप न्ह्यब्वःगु उगु मुनाया बांलाःगु पक्ष धायेमाः। तर छता खँ छु धायेबलय् थथे लजगाः यानाच्वंपिं मनूत थौंया अवस्थाय् गुलि ल्यं दनि? थुकी गुज्वःगु समस्या ब्वलना च्वंगु दु? थ्व खँ नं न्ह्यब्वये फुगु जूसा अझ बांलाइगु खः। छाय्धाःसा थ्व लजगाः दक्व थौंकन्हय् मर्स्या व मेगु जातिं लाका कायेधुंकल।थौंकन्हय्या आधुनिक ईकथं थीथी लजगाः न्ह्याका वयाच्वंगुली नं थीथी ज्याकथंया स्टलत तयातःगु च्वछायेबहःगु ज्या खः। नये-त्वनेगु नसा ज्वलंत नं उलि हे यइपुक नेवाःतय् भ्वय् नयेबलय् थें हे याना तयातःगु नं तसकं बांलाः जू। हानं बुसांनिसें मसीतले यायेमाःगु संस्कारया कतांमरि (द्यःचात) ब्वयातःगु नं उलि हे न्ह्याइपुसे च्वं ।

ज्याझ्वलय् उदाय् च्वमिपिनिगु सफू ब्वज्या यानातःगु नं छगू नालेबहःगु व न्ह्यथनेबहःगु ज्या खः। अन हे मस्तय्त म्हितका तयेगु व्यवस्था नं उलि हे व्यवहारिक जू। अथे हे उदाय्तय् बहिद्यः ब्वइगु चलन कथं अन बहिद्यः नं ब्वयातःगु खनेदु ।

आधुनिक ईकथं न्हून्हूगु डिजाइनया वसःया फेसन-शो क्यनाः स्वकुमिपिंत आकर्षित यायेगु ज्या धाःसा तसकं हे चातुर्यपूर्ण जूगु खनेदत। अले इहिपा याइबलय्या शो व उदाय् मस्तय्सं फीगु लं धकाः छगू न्हूकथंया दौरा सुरुवाः व तपुलिं यानाः स्वकुमितय्सं तसकं हे न्ह्याइपुकल।
अथे हे उदाय् गायकतय्सं न्ह्याइपुगु व यइपुगु म्येँ न्यंकाः ज्याझ्वःयात अतिकं झःझः धायेका बिल। उकी नं पुलांम्ह पप गायक रमेश ताम्राकारं "वने त्यल जि ला थौं कलाःया थःछेँ" व "लाय्कुली दरबार दु" बोलया पुलांगु म्येँ हाला बिउबलय् स्वकुमिपिं अतिकं उत्साहित जूगु खः ।

थ्व ज्याझ्वलय् दकलय् न्ह्याइपुगु ई अबलय् वल गबलय् हनेबहःम्ह भाजु पद्मरत्न तुलाधरया 'लोडसेडिङ्ग खतम संविधान हजम' नाटक मञ्चन जुल। थुकी सुरेश तुलाधर, प्रबोध कसाः व अरुणसिद्धि तुलाधरपिंसं अभिनय यानादीगु खः। नेपाःमि जनतां लोडसेडिङ्गं यानाः मोबाइल तकं बांलाक चार्ज याये मखनाः महत्वपूर्ण ज्याखँ याये मखंगु व विद्युतीय सामाग्री छ्यलाः याये माःगु थीथी ज्या याये मखंगु थेंजाःगु सकतां समस्या नाटकय् स्पष्ट रुपं क्यंगु खः। नाटकय् पुलुकी (जुनकिरी) या फार्मिङ्ग यायेमाःगु व भारतं विद्युत न्यायेगु चाहना झीके ब्वलनाच्वन धइगु थीथी ब्यङ्ग्य नं न्ह्यब्वयातःगु खः ।

अथे हे संविधान दयेकेगु खँय् नेपाली काँग्रेस, माओवादी व एमालेतय्गु ल्वापु व सरकार दयेके मफयाच्वंगु समस्या नं न्ह्यब्वयातःगु खः। आः संविधान दयेके मलाइगुलिं खुला वा दछि जक मखु न्यादँनिसें झिदँ हे म्याद तंसां पालंपाः प्रधानमन्त्री नये खनी धकाः ध्याचू नकूगु खनेदु। अले सोझा व भिंज्या याइम्ह नेपाल एयरलाइन्सया जि.एम. सुगतरत्न कंसाकारयात भ्रष्टाचार याःगु धकाः मखुगु मुद्दाय् ज्वना यंकूसां विरोधय् नेवाःत कुहां वये मफुगु खँय् राजनैतिक चेतना दयेमाः धइगु खँ नाटकं न्ह्यब्वःगु खः।
उकिं उदाय्तय्सं याःगु थ्व उदाय् मुना ज्याझ्वः तसकं बांलाः तर सम्बन्धित उदाय् दुने, अझ धायेमाल धाःसा नेवाः दुने छुं छुं समस्या ब्वलनाच्वंगु दु। उकी दुने दुहां वनाः दुनुगलंनिसें विचाः यानाः समस्या समाधान याये फुसा जक हे मुनाया अर्थ दइ। मखुसा थ्व नं छगू व्यवसाय जक जू वनी। छम्ह-निम्हेसित आर्थिक लबः दइगु सिबाय् मेगु छुं जुइ मखु। अथे हे लिपा यदि थ्व ज्याझ्वः यायेगु खःसा उदाय्त जक मखु सकल नेवाःतय्त ब्वनाः ज्याझ्वः न्ह्याकूसा बांलाइ ।

तसकं यइपुक, न्ह्याइपुक ज्याझ्वः न्ह्याकादीम्ह पवित्र कसाःयात धाःसा आपालं आपाः सुभाय् बी हे माः। न्ह्यागु हे जूसां ज्याझ्वः ताःलाःगुलिं ग्वसाः खलःयात भिंतुना। हाकनं हाकनं थज्याःगु ज्याझ्वः याये फयेमाः। सकल नेवाःत छवाः जुइ फयेमा ।

More Stories Like this