झापाय् नेवाः भाय् प्रशिक्षण

नेवाः देय् दबू व मिसा दबू तोपगाछी झापाया ग्वसालय् नेपालभाषा प्रशिक्षण ज्याझ्वः न्ह्यात। नेवाः देय् दबु तोपगाछीया नायः नेत्र श्रेष्ठया अध्यक्षताय् जूगु उगु ज्याझ्वलय् मू पाहां नेवाः देय् दबू झापाया नायः कृष्ण उदास, विशेष पाहां गाविस सचिव तोपगाछी, झापाया विरेन्द्र खड्का व राष्ट्रिय आदिवासी जनजाति महिला महासंघ झापाया गंगा श्रेष्ठ, पाहांपिं शान्ति राई व भाषा प्रशिक्षक प्रतिभा श्रेष्ठपिंसं न्ववानादीगु खः ।

मिसा दबू तोपगाछीया नकिं रोजिना श्रेष्ठं लसकुस यासें न्ह्याकूगु उगु ज्याझ्वलय् कृष्ण उदासं नेपालभाषाया महत्व बारे कँसें महाकवि सिद्धिदास महाजुं "भाषा म्वाःसा जाति म्वाइ व जाति म्वाःसा देश म्वाइ" कना थकूगु खँया व्याख्या यानादिल। उगु प्रशिक्षणय् भाषा जक मखु नेवाःतय् लिपि व नखःचखः, नसात्वँसा बारे नं जानकारी बीगु ताः तयातःगु दु।
उगु हे ज्याझ्वलय् न्ह्यःने वयाच्वंगु राष्ट्रिय जनगणना २०६८ बारे जानकारी बिसें उकी नेवाःतय् पाय्छि ल्याः पिकायेगु लागिं सकस्यां थःगु भाषा व जाति शुद्ध जुइक च्वकेत इनाप यायेगु ज्या नं जूगु खः ।

अथे हे आदिवासी जनजाति जिल्ला समन्वय परिषद् झापापाखें देवी प्राथमिक विद्यालय बिर्तामोडय् आदिवासी जनजाति भेला व राष्ट्रिय जनगणना २०६८ बारे छगू गोष्ठी यात। आदिवासी जनजाति समन्वय परिषद झापाया अध्यक्ष प्रेम घिसिङया अध्यक्षताय् जूगु उगु ज्याझ्वलय् मूपाहां कथं आदिवासी जनजाति महासंघया केन्द्रीय अध्यक्ष राजकुमार लेखीं न्ववानादीगु खः। ज्याझ्वलय् किरात याकथुङ्ग चुम्लुङ्ग झापाया पूर्ण लावती, नेवाः देय् दबू झापाया कृष्ण उदासपिंसं न्ववानादीगु खः ।

More Stories Like this