म्याद थपे याःसां संविधान वइ मखु
कांग्रेस संविधानसभाया म्याद थपे मयायेगु पक्षय्
येँ (सन्ध्या टाइम्स)/जेठ १४ गते न्हूगु संविधान पित बी फइगु अवस्था मदुगुलिं आः संविधानसभाया म्याद छुं ई हानं थपे याये माली धकाः चर्चा जुयाच्वंगु इलय् नेपाली कांग्रेसं धाःसा म्याद थपे मयायेगु कथंया संकेत बियाहःगु दु। नेपाली कांग्रेस संसदीय दलया नेता रामचन्द्र पौडेलं संविधानसभाया म्याद थपे यानाया छुं हे औचित्य मदुगु कारणं म्याद छाय् थपे यायेगु धइगु पक्षय् थःपिं वनाच्वनागु खँ स्पष्ट रुपं धयादीगु दु ।
म्हिगः बहनी बीबीसी नेपाली सेवालिसे खँ ल्हासें वय्कलं संविधानसभाया म्याद थपे यानाः नं न्हूगु संविधान मवइगु खःसा थुकियात म्याद थपे मयाःसां छु पाइ धकाः न्ह्यसः तयादीगु खः ।
म्याद थपे याःसां नं संविधान वइ धइगु ग्यारेन्टी मदुगु कारणं यानाः थःपिंसं म्याद थपे यानाच्वने माःगुया छुं हे कारण मखना धकाः नं वय्कलं धयादीगु दु। तर म्याद थपे मयायेसातकि संविधानसभा भंग जुइ। संविधानसभा भंग जुल धाःसा न्हूगु संविधान गय् यानाः दयेकी धइगु खँय् धाःसा वय्कलं छुं न्ववानामदी ।
छुं जुयाः आः प्रमुख प्रतिपक्षी नं जुयाच्वंगु नेपाली कांग्रेसं समर्थन मयात धाःसा संविधानसभाया म्याद थपे जुइ मखु। संविधानसभाया म्याद थपे यात धाःसा माओवादीयात जनविद्रोहया तयारी यायेगु ई जक अप्वः दइ धइगु विश्लेषण यासें नेपाली कांग्रेसं म्याद थपे मयायेगु पक्षय् बिचाः तयाच्वंगु खँ धाःगु दु। पौडेलं माओवादीया विद्रोह पनेगु लागिं नं संविधानसभाया म्याद थपे याये मजिउगु बिचाः नं तयादीगु खः ।
उखे कांग्रेसया नेता शेर बहादुर देउवां नं जेठ १४ गते संविधान मवल धकाः छुं हे कथं चिन्ता कायेम्वाः धयादीगु दु। थःगु हे गृहजिल्लाय् न्ववासें वय्कलं संविधान मवयेवं तुं आकास कुतुं वइ धकाः ग्यायेमाःगु आवश्यकता मदु धासें संविधान लिपा हे जक वःसां छुं मपाः धयादीगु दु।
माओवादी धाःसा आः मेगु खुला म्याद थपे यानाः जूसां न्हूगु संविधान जारी यानां तुं त्वःतेगु बिचाः यानाच्वंगु दु ।
