मातृभाषाया शिक्षा बारे शिक्षामन्त्रीयात ज्ञापन
येँ (सन्ध्या टाइम्स)/देशय् दक्व भाषायात राष्ट्रिय भाषाया मान्यता बीमाः धइगु मागलिसें वंगु सोमवाः नेपाल लोकतान्त्रिक नेवाः संघं शिक्षामन्त्रीयात छगू ज्ञापनपत्र लःल्हाःगु दु ।
ज्ञापनपत्रय् थौंकन्हय् शिक्षा ख्यलय् १०० पूर्णांकया खस भाषा जुयाच्वंगुली ५० पूर्णांक जक यानाः ल्यं दुगु अंकया निंतिं मातृभाषा विषय ब्वंके माःगु खँ न्ह्थनातःगु दु। अथे हे मातृभाषाया विकल्पय् गणित, लेखा, अर्थशास्त्र, कम्प्युटर विज्ञान थेंजाःगु विषय मतसे मातृभाषाया विकल्प मातृभाषा हे जुइमाःगु खँ नं उकी न्ह्यथनातःगु दु ।
सरकारी, सामुदायिक लिसें निजी शैक्षिक संस्थां नं मातृभाषां आखः ब्वंकेगु नीति छ्यलेमाः धासें शिक्षक दरबन्दी जुइमाःगु माग नं उकी यानातःगु दु। थुकिया लिसें नेवाःतय्गु मातृभाषा 'नेपालभाषा' जूगुलिं 'नेवारी भाषा' धायेगु चलन न्हंकेमाः धासें फुक्क मातृभाषाया अध्ययन अनुसन्धानया यायेगु निंतिं नेपाल बहुभाषिक विश्वविद्यालय नीस्वने माःगु प्रस्ताव नं ज्ञापनपत्रय् यानातःगु दु। सामुदायिक विद्यालयं थःगु लागाय् च्वंगु जग्गाय् छेँ दनाः बालं बी मदुगु व निजी विद्यालयं लाक्वपाक्व शुल्क कायेगु थेंज्याःगु ज्यायात निरुत्साहित याये माःगु माग नं ज्ञापनपत्रय् यानातःगु दु ।
राज्य पुनर्संरचना धुंकाः शिक्षा नीति अवलम्बन यायेबलय् सम्बन्धित प्रदेशया भाषिक विशिष्टतायात ध्यान बीमाःगु व न्हूगु शिक्षा नीति व पाठ्यक्रम निर्माण याये न्ह्यः सरोकार मातृभाषा समूहया संघसंस्थालिसे सहकार्य यायेगु निंतिं मन्त्रालयपाखें स्थायी संरचना विकास यायेमाःगु खँ नं उकी न्ह्यथनातःगु दु ।
