आः नं वइतिनि ला राष्ट्रिय सरकार?
एमाले दुने ब्वलनाच्वंगु आन्तरिक कचवंया झ्वलय् आः प्रधानमन्त्री एवं एमालेया अध्यक्ष झलनाथ खनालं वइगु जेठ १४ गते दुने हे राजीनामा यायेमाः धइगु सः नं पिहां वःगु खनेदत। पार्टीया वरिष्ठ नेता केपी ओलीं छगू सार्वजनिक ज्याझ्वलय् न्ववायेगु झ्वलय् थःगु हे पार्टीया अध्यक्ष लिसें प्रम खनालं राजीनामा यायेमाः धकाः तप्यंक इनाप यानादीगु खः। वय्कलं थ्व सरकारं नं राष्ट्रिय सरकार गठन याये मफुगु कारणं न्हापाया सरकारं थें थव सरकारं नं राजीनामा बियाः राष्ट्रिय सरकार गठन याइम्हेसित लँ त्वःता बीमाः धयादीगु खः ।
तर आः तकया अनुभवं थ्व धाःगु दु कि दलया नेतातय्सं धायेगु यानाच्वंगु राष्ट्रिय सरकार वास्तवय् सम्भव दुगु ज्या मखु। माओवादी दुथाय् कांग्रेस मच्वनेगु व कांग्रेस दुथाय् माओवादी मच्वनीगु निश्चित जूगु कारणं राष्ट्रिय सरकारया खँ ल्हानाः आः मेमेगु ज्याय् नापं पंगः थनेगु कुतः सुनां नं मयाःसां जिउ। केपी ओलीं नं राष्ट्रिय सरकार गठन याये फइ मखु। माधव नेपालयात थथे हे यानाः राजीनामा काःगु कारणं आः झलनाथ खनालं नं अथे यानाः राजीनामा बीमाः धइगु बालहठ हे वय्कलं क्यनादीगु खःसा व मेगु हे खँ जुल। यदि अथे मखु, आः न्ह्याथे यानाः नं याउँक न्ह्याः वनेगु खःसा आः हानं नं सरकार परिवर्तनया वेवकुफी सुनां नं मयाःसां जिउ। आःया ध्यान पूवंक हे शान्ति व संविधानय् वनेमाः। सरकार हिलाच्वनेगु कुतः वास्तवय् चुनावय् बुनाः हीमी चासें संविधानसभायात हे असफल यायेत स्वयाच्वंपिं मनूतय्गु चाल जक खः धइगु खँ पुष्टि हे जुइधुंकूगु दु। आः उकी लगे जुइगु पाय्छि मखु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
