पौभाः ब्वज्या

शीला साय्मि

कलाकारपिनि निंतिं कला छगू साधना खः। थःगु नुगःया भाव अभिव्यक्त यायेगु माध्यम नं खः। कलाकारपतिकं कला पानाच्वंगु दइ अले ईलिसें कला हिला नं वनाच्वंगु दइ। दसु कथं वंगु २०६८ बैसाख १३निसें सिद्धार्थ आर्ट ग्यालरी बबरमहलय् जुयाच्वंगु पौभाः ब्वज्यायात हे काये। न्हापा न्हापा पौभाः धाल कि विशेष कथंया कापतय् थीथी खानी रंग, लुँ वहतकं छ्यलाः च्वयातःगु तसकं हे थिकेगु द्यःया चित्र अंकित बाखं सहितया किपा धाइगु खः। १५ औं शताब्दींनिसें तिब्बती शैली व भारतीय मुगल शैली ल्वाकछ्यानाः स्वां, सुपाँय् नं तना यंकेगु जुजुं थौंकन्हय् रियालिस्टिक बेसय् तक नं थ्यनेधुंकल। 'ज्वेल्स अफ नेवार आर्ट' नां तयाः जुयाच्वंगु थुगु ब्वज्याय् ब्वयातःगु पौभाः परम्परागत पौभाःत स्वयां पाः। मुक्कं २७ म्ह कलाकारया ६५ पाः पौभाः नापं झिगू धातुया द्यःया मूर्ति अन ब्वयातःगु खः ।

समुद्रमान श्रेष्ठं च्वयादीगु बज्रपाणीया पौभाः दकलय् तपाःगु व थिकेगु जक मखु परम्परागत शैलीयात आधुनिकता बीकथं लिउने फस्वयाच्वंम्ह वज्रपाणीं थःगु ज्वंसा कथं वज्र हे ल्हातं ब्वयेकाच्वंगु दु। वज्र ब्वयेकाः न्हू पहः छ्यलागु च्वमिया धापू खःसां भूत, प्रेत व भय न्हंकीम्ह द्यः जूगुलिं रुप भचा ग्यानापुसे च्वंकेमाःगु खः। वय्कःया मेगु पौभाः दनाच्वंम्ह महाकालया खः। निगुलिं पौभाःया मू धाःसा झिंन्यागू लाख तका तयातःगु दु। देवेन्द्रमान सिंख्वालया भैरव व कुमारी नृत्य यानाच्वंगु पौभाःया मू नं उलि हे तू। वय्कःया वज्रसत्व धातु लोकेश्वर धाःसा बी डब्लु रंगय् दु। नांजाःम्ह कलाकार पेममान चित्रकारया सिद्धपुरुषया मू ७.५ लाख तयातःगु दुसा हरिहर वाहनलोकेश्वर लगायत खुपाः पौराणिक पौभाःत प्रशंसनीय जू। नेवाःतय्गु मौलिकता क्यनेत ताःलाःम्ह मुक्ति सिं थापाया जंक्व पौभाःया मू झिगू लख तयातःगु दु ।

अथे हे सुन्दर वज्रचार्यया ७, युगरत्न शाक्यया ६, ज्ञानकर बज्राचार्यया ४, सुखराज तामाङ्गया ५, उजय वज्रार्चायया ४, राकेश महर्जन व सजिव शाक्यया २२, चन्द्र महर्जन, दिपक जोशी, दिनेश चरण श्रेष्ठ, लोक चित्रकार, मिना शाक्य, रविन्द्र शाक्य, राजप्रकाश तुलाधर, रामप्रकाश श्रेष्ठ व रितेश शाही, शंकर जोशी, सुन्दर सिंख्वाल, सुसान महर्जनपिनि पौभाःत अन ब्वयातःगु खः।
अथे हे अन सागर व सुमन शाक्य, बाबुकाजी बज्राचार्य, सानुराजा बज्राचार्य, राजेश अवाले, ज्ञानज्योती शाक्य, सानुराजा व छेँजःपिं, बोधिराज व छेँजःपिंसं दयेकातःगु मूर्ति ब्वयातःगु दु ।

सच्छिपालं मल्याक्क चित्र च्वयादीधुंकूम्ह अमृत डंगोलं थःगु सफलताया श्रेय थः गुरु विजय सर्गःयात बियादी। षट्कोणया दुने बज्रयोगिनी ह्यांगु वर्ण जुयाः खेचारी स्वयाबिज्याःगु पलेमिखा हे वय्कःया कुशल चित्रकारिताया बेजोड नमूना खः। वय्कःया उगु पौभाःया मू नं ७ लाख तयातःगु दु ।

स्वीन्यादँ न्ह्यवंलिसें थ्व ख्यलय् सक्रिय उदय् चरण श्रेष्ठं कलाकारिताया ख्यः थौंकन्हय् सम्मानित जुइधुंकूगु खँ कनादी। थःगु ज्यापौ न्ह्यब्वयेगु झ्वलय् वय्कलं कलाकारतय्सं आइकनोग्राफी कथं हे पौभाः च्वइगु खःसां नं गबलें गबलें विरोध फयेमाःगु खँय् दुःख प्वंकादिल।
सिमाय् हे बुद्धया ख्वाःपाः लुइकादीम्ह विजय सर्गःया बिचाः कथं वंगलसिमा हे बुद्धया प्रतीक खः। थुलि गुणस्तरिय ब्वज्या २०४६ सालय् नेपाल परम्परागत पौभाः कलाकार संघं ठमेलय् छक्व याःगु बाहेक आः तक मजूगुनिगु खँ वय्कलं कनादी ।

दिपककुमार जोशीया धापूकथं विश्वव्यापी रुपं थांका धया वयाच्वंसां थ्व चित्रया मौलिक खँग्वः पौभाः हे खः। अले थुकिया सुरुवात नं नेपालं हे जूगु खः। बुद्ध भगवानया अवदानय् उल्लेख जूकथं राग, द्वेष, मोहं मुक्त यानाः जगत उद्धार यायेगु निंतिं चित्त परिवर्तन यायेत चित्रबाखंया माध्यमं थुइकेगु हे पौभाःया मू उद्देश्य खः ।

परम्परागत नेवाःतय्गु कला व कलाकारतय्गु म्हसीका विश्वया न्ह्यःने ब्वयेगु तातुनाः उगु ब्वज्या यानागु खँ ग्वसाःखलःया नायः पूर्ण शाक्यं कनादिल। आःतक प्यपाः पौभाः बिक्री जुइधुंकूगु खँ कँसें शाक्यं याकनं हे भारत व अमेरिकाय् नं ब्वज्या यायेगु ग्वसाः दुगु जानकारी बियादिल। तना हे वनेत्यंगु पौभाः कला व कलाकारतय् संरक्षण व संवर्धन यायेत तसकं च्वछायेबहःगु ज्या थुगु ब्वज्यां याःगु दु ।

ब्वज्यानापं ज्यापौ नं न्ह्य्ब्वयेगु ज्या अन जूगु खः। डा. डिना वाङ्देलं 'इन द लेजेन्सी अफ अरनिको', उदयचरण श्रेष्ठं 'दि यूज अफ आयल इन टेडिसनल आर्ट', विजय शाक्यं 'एन्सेन्ट लस्ट वाय्क्स प्रोसेस मेथड अफ स्टाय्च्यु मेकिंग' व दिपक जोशीं 'पौभाः पेन्टिङ एण्ड स्पिरिचुयलिटी' विषयय् ज्यापौ न्ह्यब्वयादीगु खः ।

बोधिसत्व ग्यालरी व सिद्धार्थ आर्ट ग्यालरीया मंकाः ग्वसालय् जूगु उगु पौभाः ब्वज्याया उलेज्या डा. डिना वांङ्देलं यानादीगु खः। उकुन्हु हे विमोचन जूगु 'ज्वेल्स अफ नेवार आर्ट' (मू द्वःछि तका) नांगु सफू नं ब्वज्याय् तयातःगु दु। पौभाः ब्वज्या वइगु जेठ १गते तक न्ह्याइ ।

More Stories Like this