चालकया न्ह्यः वयाः गाडी कुतुं वन

निगू बस दुर्घटनाय् खुम्ह सित

येँ (सन्ध्या टाइम्स)/पृथ्वी राजमार्ग अन्तर्गत भुमेस्थान गाविस ९ खयारघारीइ थौं सुथय् ४ ताः इलय् चालकया न्ह्यः वयाः छगः यात्रुबाहक बस दुर्घटना जूगु दु। ना. ३ ख ९६८१ नम्बरया बस सतकं थ्यंमथ्यं ७० फिट क्वय् कुतुंवनाः जूगु उगु दुर्घटनाय् लानाः छम्ह यात्रु सीगु दुसा मेपिं १२ म्ह घाःपाः जूगु दु। उगु बस फातापुलाः कुतुं वंगु खः।

दुर्घटनाय् लानाः बाग्लुङ जिल्लाया माल्मा धइगु लागाय् छेँ जुयाः थौंकन्हय् भक्तपुर टेक्निकल कलेजय् प्रिन्सिपल जुयाः ज्या यानाच्वनादीम्ह अथे हे ३५ दँया सूर्यबहादुर मल्ल सीगु खः। उगु दुर्घटनाय् लानाः घाःपाः जूपिं मध्ये निम्ह तसकं गम्भीर दुगु खँ बैरेनीया प्रहरीं धाःगु दु। घाःपाः जूपिं सकसितं येँय् हयाः वासः याकाच्वंगु दु। घाःपाः जूपिं बाग्लुङया माल्मा ७ या शेरबहादुर सहानी, बाग्लुङ हरिया धइगु लागाया गोकुल बोहरा, बाग्लुङ पिखुया अमर नेपाली, वया जहान स्मृति व निदँ दुम्ह काय, बाग्लुङ बिउ धइगु लागाया कमल कंडेल, राजेन्द्र कंडेल, तनहुँ राइकोटया भवित्सन विक नापं मेमेपिं खः ।

दांग वनाच्वंगु गाडी दुर्घटनाय् न्याम्ह सित
येँ (सन्ध्या टाइम्स)/रुकुमया खलङगा लागां दाङया तुलसिपुरपाखे वनाच्वंगु छगः यात्रुबाहक बस थौं सुथय् दुर्घटना जुयाः न्याम्ह सीगु दुसा ख्वीम्हं मल्याक घाःपाः जूगु दु ।

रा १ ख. ३६५ नम्बरया बस अनियन्त्रित जुयाः सिमुतु धइगु खुसिइ कुतुं वंगु खः। प्रहरीं उगु बसय् अप्वः यात्रु तयाहःगुलिं अनियन्त्रित जुयाः दुर्घटना जूगु अनुमान याःगु दु। दुर्घटनाय् लानाः मदुपिनिगु सनाखत जुइ फयाच्वंगु मदुनि। स्थानीयवासी व प्रहरी जानाः अन उद्धारया ज्या जुयाच्वंगु दु। उगु दुर्घटनाय् लानाः घाःपाः जूपिंत सल्यानया जिल्ला अस्पतालय् वासः याकाच्वंगु दु। बसया चालक व सह चालक दुर्घटना लिपा बिसिउँ वंगु खः। प्रहरीं बिसिउँ वःपिं चालकतय्त मालाच्वंगु दु ।