प्रधानन्यायाधीशया न्ह्यःने ततःधंगु हाथ्या

सर्वोच्च अदालतया न्हूम्ह प्रधानन्यायाधीश कथं खिलराज रेग्मीं पदभार ग्रहण यानादीवं हे वय्कःयात निवर्तमान प्रधानन्यायाधीश रामप्रसाद श्रेष्ठया तःधंगु किपालुं झ्याप्प त्वपुया बिउगु दु। भाजु श्रेष्ठं म्होचा ई जक पदय् च्वनाः नं ततःधंगु हे ज्या यानाः आः तक वःपिं फुक्क प्रधानन्यायाधीशत मध्ये नं दकलय् अप्वः लोकं ह्वानावंगुलिं आः वय्कःयां लिपा वइम्ह प्रधानन्यायाधीश गज्याःम्ह जुइ धइगु न्ह्यसः सकभनं पिदनाच्वंगु दु ।

थ्व ई सर्वोच्च अदालत आपालं कथंया विकृतिं यानाः जनताया दथुइ अलोकप्रिय जुयाच्वंगु ई खः। न्याय ख्यलय् जुइगु भ्रष्टाचार आः आम चिउताःया विषय जुयाच्वंगु दुसा थुकिं यानाः न्यायालय प्रति जनताया विश्वास पाः वनाच्वंगु अवस्था दु। अज्याःगु इलय् छझाः झुलुक्क त्वये थें वःम्ह रामप्रसाद श्रेष्ठं सर्वोच्च अदालत आः थथें जनताया मिखां कुतुं वनी मखुनि धकाः विश्वास यायेबहःगु चिकिचाप्वाःगु छप्वाः मत च्याकादीगु खः। उलि ज्या यानाः हे वय्कलं थःगु व्यक्तित्वयात जिक्व विराट यानादिल। उकिं आः वय्कःया थें हे ज्या यानाः थःगु व्यक्तित्वयात नं अथे हे तःधंकेगु तःधंगु हाथ्या प्रधानन्यायाधीश रेग्मीया ब्वहलय् लाः वयाच्वंगु दु। धायेत ला वय्कलं भाजु श्रेष्ठं शुरु याना थकूगु ज्यायात थम्हं नं निरन्तरता बी ला धयादीगु दु। तर ज्या यायां वनेबलय् थम्हं हे मचायेक अनियमितताया चक्करय् लाः वनाच्वनेफु, थुकी सतर्क मजुसें मगाः। न्यायालय राज्य व्यवस्थाया दकलय् बल्लाःगु थां खः। यदि थ्व थां कमजोर जुल धाःसा राज्य हे असफल जूवनेफु। थुकियात धिसिलाका तयेगु तःधंगु जिम्मेवारी रेग्मीया ब्वहलय् दु ।

More Stories Like this