देय्या आभूषण

नर्मदेश्वर प्रधान

खँयाखँय्
अनुजा। माइक्रोबसय्। सुनां त्वःफिकूगु ९१ लाख दां व हिराया हार अनुजां लुइकी। काइ। छेँय् यंकी। "थुवाःयात जिं लित बी हे माः। लोभ याये मजिउ।" मन क्वातुकी। थुवाःया फोन लुइकी। फोन याइ। थुवाः वइ। लय्ताइ। अनुजायात निगू लाख दां सिरपाः बी। अनुजां काइ मखु। हिराया हार लःल्हाइ। अनुजां स्वीकार याइ मखु। अनुजां धाइ, "इमान्दारिता जिगु धन। जिगु वैभव। ध्यबा। तिसाप्रति जिके मोह मदु।" फुक्क अखबारय् 'अनुजा' विषय चर्चा जुइ। अनुजाया इमान्दारिताया बयान वइ। ब्वने। जि नं स्तब्ध। अनुजा। धन्य। गज्याःगु विवेक। इमान्दारिता। स्तुत्य। पूज्य। अनुजा जिगु देय्या म्ह्याय्मचा। गर्व अनुभव जुइ। मानौं अनुजा जि हे खः। अनुजाया महान् इमान्दारिता थःगु हे इमान्दारिताथें ताइ।
अनुजाया खँ स्वइतं कनेमास्ति वइ। कलाः खनेवं धाये, "न्यँ, थौंया महान बुखँ। ठग, खुँ, भ्रष्टाचारीतपाखें पीडित थ्व देय्। देशय् प्यखेरं अन्धकार। अन्धकारय् देश तनाच्वंगु ई। आश्चर्य ! थौं जःया रेखा जुयाः अनुजा त्वइ।" लय्तातां कने अनुजाया इमान्दारिताया बुखँ। नुगः थहां वइ। जिगु देशय् भिंपिं नं दु खनिं।छाय् निराश जुइगु ! देशय् भिं जुइ तिनि। निम्ह प्यम्ह अनुजा दत कि देश स्वर्ग जुइ। अनुजाया महान् इमान्दारिताया बुखँ। उखुन्हु जिं नापलाक्वसित कना जुइ ।

अनुजाया इमान्दारिताया बुखँ गल्लि, बजाः, छेँछेँय् चर्चाया विषय जुइ। ९१ लाख दां, हिराया माः ल्हाःती लाइ। अनुजां नक्व पाक्व जुइ। चिठ्ठां लाःगु सरह। तर अनुजां लोभ याइ मखु। कर्किया धन नये मजिउ। व महापाप खः। लित बी हे माः। अनुजा दृढ जुइ ।

इमान्दारिता थौं देशय् आइसल्याण्डया सर्प थें जुइधुंकल। असम्भव तर अनुजालिसें थौं असम्भव सम्भव जुया? लुइ। देशय् फुक्क विस्मित ! असम्भव मूर्खया शब्दकोशय् जक दइ। नेपोलियनया धापू लुमनी। झी आशावादी जुइमाः। अनुजाया इमान्दारितां ज्ञां बी ।

देशं अनुजायात हनेमाः। कदर यायेमाः। नुगलय् खँ म्हिताच्वनी। मेकुन्हु अखबारय् बुखँ वइ। राष्ट्रपति रामवरण यादवं इमान्दार अनुजायात स्याबासी बी। "स्याबास ! अनुजा ! देशया आदर्शवान म्ह्याय् खः छ। छ थेंज्याम्ह महान् म्ह्याय् बुइकूम्ह छं मां-बौयात जिगु अभिवादन न्यंका बिउ। छंत याकनं राष्ट्रपति भवनय् नापलाये।" मनय् लुइ। धन्य राष्ट्रपति। जनताप्रति गुलि संवेदनशील। इमान्दारिताया पारखी। प्रधान न्यायाधीश रामप्रसादजुं नं अनुजायात प्रशंसा सन्देश छ्वइ। स्वयं इमान्दारिताया लागि प्रशंसित प्रधानन्यायाधीश रामप्रसाद श्रेष्ठजु इमान्दारिताया कदर यायेत छाय् लिउने लाइ।
टि.भि.त अनुजायाथाय् थ्यनी। अन्तर्वार्ताया लागिं लाइनय् च्वनी। पत्रकारतय्सं अनुजायात भुनी। मोबाइलय् अटुठ प्रशंसा बर्षे जुयाच्वनी। अनुजाया न्यताः अबीरं जाइ। ल्हाती स्वांया बुके प्वनी मखु। घौछि हे फुर्सद दइ मखु। ध्यबा गुकथं लुइका, गुकथं लित बिया? अनुजां घटनाया विवरण कनाच्वनी। अखबारय् लेखत खने दइ। देशयात थौं अनुजा मालाच्वंगु दु। सलंसः सम्पादकयात पौ खने दइ। अनुजा थेंज्याःम्ह निम्ह प्यम्ह दुसा देश स्वर्ग जुइ। लेख, रचना सम्पादकयात पौत ब्वने। जिगु सहमति दइ। जनतां इमान्दारिताया कदर याइ। नेतातय् बेमानीं निराश जनता। अनुजाया इमान्दारितां उत्साहित जुइ। जिं मनमनं धाये। अनुजा छ देशया आभूषण खः ।

अनुजा। अनुसन्धानया लागिं पुलिसया हिरासतय् ! अकस्मात अखबारय् ब्वने। सिमां कुतुंवः थें जुइ। जि थः हे पुलिसया हिरासतय् लाःथें ताइ। ९१ लाख दां, हिराया माः लुइकूगु, लित बिउगु। अनुजाया खँ। फुक्क फय्गं। पूर्ण कल्पित। सुनियोजित बाखं खनिं। बुखँत वइ। म्हिगःया अनुजाया इमान्दारिताया बाखं तासया छेँ थें दुनी।
जिके शंका यायेगु बानी। "न्ह्यागु खँय् नं छि शंकालु। शंका यायेमाः।" कलाः, मस्तय्सं धयाच्वनी। अनुजाया इमान्दारिताया खँय् जिं उकिं शंका मयाना। शंकालु स्वभावया आरोपं सुरक्षित जुइत स्वया। तर जब अनुजाया फुक्क नाटकया बारे ब्वने। जिं क्वःछी। थ्व देशयात थुइकेगु खःसा जिं शंका याये हे माः। शंका अनिवार्य। विश्वासं थन छुं बीमखु। मात्र धोका ।

राष्ट्रपतिं अनुजायात बिउगु सन्देश मिखाया न्ह्यःने दं वइ। "स्याबास ! अनुजा ! छ थेंज्याःम्ह इमान्दार म्ह्याय्या मां-बौयात जिगु शुभकामना।" अनुजा देशया आवश्यकता खः। अनेक लेख सम्पादकयात पौत न्ह्यःने खने दइ। राष्ट्रपतिया स्याबासी, लेख सम्पादकयात पौत जिं थुइकेत स्वये। अचानक अनुजा फटाहा। ध्वं लाइम्ह सिद्ध जुइ। वं राष्ट्रपतियात तकं ध्वं लाइ। स्याबासी काइ। अनुजा। म्हिगःया प्रशंसापात्र। थौं उपहासया पात्र जुया बी।
तर। अनुजा जिगु मिखाय् मात्र अनुजा जक जुइ मखु। वया अभिनयं सांकेतिक अर्थ अनुभव जुइ। वया नाटक प्रतीकात्मक ताइ। वं थःत प्रतीक याइ। देशया फटाहा नेतातय् भ्रामक इमान्दारिताया। वं क्यंगु सम्पूर्ण नाटक थौं देशय् च्वंपिं फटाहा, ध्वं लाइपिं इमान्दार नेतातय् क्यारिकेचर थें ताइ। खः। अनुजां फटाहा खँ ल्हाइ। तर वं भ्रष्टाचार याःगु मदु। धात्थें करोडौं करोड ध्यबा जुकाः नं इमान्दारिताया ख्वाःपाः पुइपिं खुंखार मनूत दु। देश व जनतायात दुःख बियाच्वंपिं। अनुजाया नाटकं अज्याःपिंपाखे ध्यानाकर्षण याइ। सतर्क याइ ।

देश थौं फटाहातपाखें सञ्चालन जुयाच्वंगु दु। देशय् इमान्दार मखु। इमान्दारिताया अभिनय याइपिं नेतात अनिवार्य जुइ। राष्ट्रपतिं अनुजायात बिउगु स्याबासीं थ्व हे सन्देश संकेत याःगु अनुभव जुइ। फटाहा तर इमान्दारिताया अभिनय यायेसःपिं नेतात बुइकूपिं मां-बौपिंत झीसं नं अभिवादन याये। थज्याःपिं नेतात थौं देशया शोभा जुइ। इपिं अनिवार्य। आवश्यक। इपिं देशया आभूषण खः। अनुजा ! छंगु नाटक स्वयाः थ्व हे खँ थुइ ।

More Stories Like this