'चीधंगु समितिं संविधान दयेकि'

नेकां नेतात संविधानसभा भंग यायेगु पक्षय्

येँ (सन्ध्या टाइम्स)/नेपाली कांग्रेसया नेतातय्सं आःया अवस्थाय् संविधानसभा भंग यानाः चीधंगु समिति दयेकाः न्हूगु संविधान दयेकेमाः धयाहःगु दु। नेपाली कांग्रेसया चितवन नारायणगढ लागाय् याःगु कार्यकर्ता भेटघाट ज्याझ्वलय् न्ववासें कांग्रेसया केन्द्रीय नेता प्रदीप गिरीं थ्व बिचाः प्वंकादीगु खः। वय्कलं आः वइगु जेष्ठ १४ गते संविधासभाया म्याद फुइत्यंगु खँ न्ह्यथँसें आः संविधानसभाया म्याद थप मयासे अथे चीधंगु समिति दयेकाः ज्या यायेमाः धयादिल। आःया हे संविधानसभा ल्यनाच्वन धाःसा न्हूगु संविधान दयेके फइ मखु धकाः दावी यानादिसें कांग्रेसया नेता गिरीं न्हूगु संविधान दयेकेगु खःसा अथे चीधंगु समिति दयेकाः ज्या यायेमाः धयादिल। वय्कलं धयादिल, 'बरु जेष्ठ १४ गते न्ह्यः हे चीधंगु स्वरुपया छगू समिति दयेके फइ बाय् माओवादीं धाःथें गोलमेच बैठक याये फइ ।'

थौं सुथय् जूगु उगु ज्याझ्वलय् मेम्ह केन्द्रीय दुजः नरहरि आचार्यं जनविद्रोहया कार्यदिशा स्थगितया घोषणा यानाः माओवादीं संविधानसभाया म्याद थप यायेगु न्हूगु चाल म्हितल धकाः ब्याख्या यानादिल। वय्कलं धयादिल, 'विद्रोहया नीति त्याग यानागु घोषणा यात धाःसा जक माओवादीयात विश्वास याये फइ ।'

कांग्रेस नेता आचार्यया धापूयात समर्थन यानाः उगु ज्याझ्वलय् नेता गिरीं धयादिल, 'माओवादीतय्सं थुकियात आत्मसमर्पण धकाः थुइकेफु तर शान्ति व लोकतन्त्रया स्थायित्वया निंतिं माओवादीं अथे आत्मसमर्पण याये हे माः ।'

उगु ज्याझ्वलय् मेम्ह केन्द्रीय दुजः डा. मिनेन्द्र रिजालं न्हूगु निर्वाचन यायेगु हे आःया अवस्थाय् उपयुक्त जुइ धयादिल। वय्कलं धयादिल, 'आःया गुगु स्वरुपया संविधानसभा दु थुकिया आधारय् दँदँ तक वंसां नं संविधान दयेके फइ मखु, उकिं थुकियात विघटन यायेगु हे बांलाइ।' वय्कलं संविधानसभा मंत धाःसा तःधंगु संकट वइगु धायेगु गलत जुइ धकाः नं धयादिल।'