सभासद्तय् इज्जतय् हानं मेगु छगू दाग

संविधानसभाय् नेकपा (माले-समाजवादी) पाखें सभासद् जुयाच्वंम्ह शारदा नेपालीं म्हीग नेपालगंजय् अय्लाः त्वनाः क्यंगु तमाशा खंपिं मनूत ताज्जुब चायाच्वंगु दु। ख ला थ्व छम्ह सभासदं याःगु ज्या खः तर थुकिं संविधानसभाय् दुथ्याःपिं फुक्क हे सभासद्तय्त बदनाम यानाच्वंगु दु। इलय् हे संविधान दयेके मफुगु कारणं सभासद्त अथें नं जनताया मिखाय् धू जुयाच्वंगु दु। संविधान दयेकेगु ज्या मयासे खालि भत्ता जक नयाच्वन धकाः हीमीचाःपिं जनतां सभासद्तय्त न्हिनय् हे न्यतालय् दायेगु ज्या तकं याना हःगु दु। सभासद्त आः म्हय् संविधानसभाया तक्मा घाना जुइत मछालापुगु अवस्थाय् थ्यनाच्वंगु दु। अथे हे हीमीचाःपिं मनूतय्सं आः ला सतकय् च्वनाः ६०१ म्ह सभासद्तय् मंकाः सराद्ध तकं यानाहःगु दु। थज्याःगु इलय् सभासद्त धाःसा छगूयां लिपा मेगु कुकर्म यायां जनताया न्ह्यःने झन हे बदनाम जुजुं वयाच्वंगु दु। गुलिं सभासद् कुटनीतिक पासपोर्ट मीगु काण्डय्, गुलिं घूस फ्वनेगु काण्डय्, गुलिं घूस बीगु काण्डय् लानाच्वंगु दु। थ्व ला सभासद्तय्सं याना जूगु पिनें खने दुगु काण्डत खः। खने मदुगु काण्ड अझ गुलि दु, धाये थाकुनि। सभासद्तय् थज्याःगु ज्यां यानाः संविधानसभाय् दुथ्याःपिं इमान्दार सभासद्तय्गु तकं इज्जत वनाच्वंगु दु। थुकिं यानाः थज्याःपिं सभासद्तय्त म्वाःम्वाःसां भत्ता नका तयेगु पलेसा संविधानसभाया म्याद थपे मयायेगु हे वेश जू धाइपिं नं पिहां वयाच्वंगु दु। इमान्दार सभासद् व संविधानसभाया प्रतिष्ठाय् घाः लाकेगु ज्या याइपिं सभासद्तय्त प्रहरी कारवाही जक मखु संविधानसभाया कारवाही नं यायेमाः ।

More Stories Like this