धर्मगुणी जीवरत्न अर्थात गुलुपाःरत्न

ज्ञानेन्द्ररत्न वज्राचार्य

धर्मगुणी भाजु जीवरत्न (गुलुपाःरत्न) स्थापित बागबजाः येँय् च्वनादीम्ह छम्ह बौद्ध धर्मया उपासक जक मखुसें बौद्ध धर्मयात परन्तु तक नं ल्यंका तयेया निंतिं थःके दुगु तन, मन, धन पर्यन्तं दुनुगलंनिसें क्वसायेकाः न्ह्याना च्वनादीम्ह गुलुपाःरत्नया नामं यक्वसिनं म्हसिउम्ह ब्यक्तित्व खः। ध्यबा दुपिं मनू यक्वं दु।तर बुद्ध धर्म कथं ध्यबायात सही ढङ्गं छ्यलेया निंतिं न्हय्गू प्रकारया गुणधर्म नं माः। गथेकि न्ह्याबलें मन प्रसन्न जुयाः ज्या यायेगु श्रद्धा, चालचलन बांलाकेगु शील, कर्पिंसं धाइल्हाइगु सकतां बिचाः यानाः ज्या यायेगु लज्जा व भय, हनेबहःपिंसं बिउगु धाःगु खँ न्यनेफुगु बहुश्रुत, करपिंसं धाइल्हाइगुयात पर्वाह मतसे भिंगु ज्याखँय् थम्हं फूचाःकथं लोभ मयासे सुइतं दान, प्रदान यायेगु त्याग व धाःगु खँयात खः मखु भिंमभिं छुटे याये फइगु बुद्धि प्रज्ञा थुलि न्हय्ता गुणधर्म दयेकेगु आवश्यक जू। भाजु जीवरत्न स्थापित थुलि न्हय्ता गुण धर्म अनुसरण यानाः बौद्ध धर्मयात कुंकुलामय् न्यंकेया निंतिं आः तक स्वनिगः व स्वनिगलं पिने देश, विदेशय् न्यंक १४ ईन्चया डायमिटर स्वफा जाकि न्ह्यंगु थीथी कलात्मक बुत्ता कियातःगु स्वयम्भू चैत्यय् लुं सियातःगु गुलुपाः (पिण्डपात्र) दान प्रदान यानादीगु दु। बुद्धया जीवनीकथं भगवान बुद्धं ८० दँय् निर्वाण प्राप्त यानाबिज्याःगु दँयात लुमंकाः ८० ग्वः गुलुपाः दान यायेगु मंतुनाकथं अन्तिम गुलुपाः अमेरिकाया पोर्टल्याण्डय् नेपाःया हे शैलीं दयेकातःगु नृत्यमण्डल महाबिहार पोर्टल्याण्ड बहाःयात वंगु बैशाख १० गते शनिवाः कुन्हु वय्कःया थःगु हे छेँय् ज्ञानमाला भजन व परित्राण पाठ याकाः, धर्मोदय सभाया नायः बद्रीरत्न वज्राचार्यजुपाखें बौद्ध अवदानया बाखं कंकाः, लःल्हानादीगु खः। उगु गुलुपाः संकल्प वाक्य ब्वनाः लःल्हाना कयादीम्ह पोर्टल्याण्ड बहाःया हामा प्रज्वलरत्न वज्राचार्यया दाजु सर्वज्ञरत्न वज्राचार्य खः ।

वय्कः भाजु जीवरत्नजुं उकुन्हु गुलुपाः जक दान याःगु मखु। ३ फिट याम्ह सेरामिकया बुद्ध प्यम्ह नं दान यानादीगु खः। धाडिङ्ग, बुटवल, बन्दीपुर व रुपन्देहीया विहारयात उगु मूर्ति लःल्हानादीगु खः। थज्याःगु बुद्ध मूर्ति वय्कलं आः स्वनिगलं पिनेया थीथी लागा गन कि बुद्धया नां तकं कायेम मसःपिं मनूत दु, अज्याःथाय् तकं यानाः झिंप्यम्ह दान यानादीधुंकूगु दु। बुद्धया मूर्ति न्ह्यःने च्वनाः वरदान फ्वनेगु मखु। बुद्धया उपदेश, बुद्धया धर्म दर्शन लुमंकाः उकियात अनुशरण यायेगु खः। बुद्धं बरदान गबलें बी मखु ।

थुकथं वय्कलं बौद्ध धर्म न्यंकेया निंतिं गुगु कुतः यानादिल व तसकं च्वछायेबहः जू। बुद्ध जन्म जूगु देय् नेपाःगालय् हिन्दूराष्ट्र धया तःगु बौद्ध धर्मयात क्वत्यलातःगुयात रक्षा यायेगु तातुनाकथं ज्या न्ह्याका वयाच्वनादीम्ह खः। थुज्वःगु ज्या थौं तक सुनानं याःगु मखनानि। छछाः छप्यय् चूलाकेगु ज्या ला लँय् फ्वनाः नइपिं फ्वगिंतय्सं नं चूलाकाच्वंगु दु। छछाः छप्यय् चूलायेधुंकाः परिवारया निंतिं त्वाःबाहाःयापिनि निंतिं, समाजया निंतिं व राष्ट्रया निंतिं छु यायेगु धइगु न्ह्यसः ब्वलनी। देय्या सचेत नागरिक खःसा थः म्वानाया अर्थ झीसं अवश्य नं थुइकेमाः। ल्हाःतुति ला दक्व प्राणियाके दु। तर ल्हाःतुतियात नयेगु, त्वनेगुली जक सीमित जुल धाःसा व ल्हाःतुतिया अर्थ निरर्थक जुइ। शरीर छन्हु त्वःता वनेगु अवस्थाय युगयुग तकं थःगु नां अजर, अमर जुइगु लकस पित बीगु हे थःम्वानाया अर्थ थुइकेगु खः। योगदान यायेगु लागा अनेक दु। गथेकि धार्मिक, सांस्कृतिक, भाषिक, कला, सम्पदा, प्राविधिक, राजनैतिक आदि। वय्कः भाजुं थःगु योग्यता व सामर्थकथं गुगु ज्या यानादिल, उकिं वय्कःया म्वानाया अर्थ स्पष्ट याइ। गुलुपाः थेंज्याःगु ज्वलं ८० ग्वः तक दान प्रदान याये धुंकूम्ह वय्कःयागु नां गिनिज बुकय् दुथ्याकेबह जू। वय्कलं थःगु हे दानापानी नयाः सकतां खर्च फ्यानाः बचे जूगु ध्यबां स्वचित्त, स्वमनं त्याग, भावनां स्वफा स्वफा मछि जाकि न्ह्यंगु, व नं छचाखेरं थीथी बुत्ता कियातःगु गुलुपाः दान प्रदान यानादीगुलिं वय्कःयात सकस्यां हनेमाःगु हे खः। उकिं नं वयकःया ज्या व नांयात बौद्धख्यःया सम्बन्धित सरोकार ब्यक्तिपिनिपाखें गिनिज बुकय् प्रस्तावित याना बी माःगु खनेदु। उलि जक मखु वय्कः नं सेरामिकया ३ फितमछि दुम्ह शाक्य मुनि बुद्धया मूर्ति तक नं थौंतकया दुने १४ म्ह मछि दान प्रदान याना वया च्वनादीम्ह उद्धार भावनां थः जहान परिवारयात तक नं बुद्ध शासनया दुने तयाः बौद्ध धर्माचरणय् ब्वति कायेका वया च्वनादीम्ह दुर्लभगु मनुस्य जीवनय् म्वाना थें म्वायेसःम्ह ब्यक्तित्व खः। अझ नं वय्कलं धयाच्वनादीगु दु, स्वनिगलं पिने सुनां नं बुद्धमूर्ति स्थापना यायेमाःगु मनसुवाः दुपिंसं वय्कःयात स्वापू तयाः इनाप यानादिल धाःसा उगु शाक्यमुनि बुद्धया मूर्ति प्राप्त यायेफू। थुकी छुं हे शंका याये थाय् मदु। वय्कःयात जिगु दुनुगलंनिसें यक्व यक्व सुभाय् दु। परन्तु थःगु जीवन पर्यन्तं थुकथं हे बौद्ध धर्मया सेल्लाःम्ह उपासक जक मखसे बौद्ध धर्मया दकलय् उत्तमगु दशपारमिता मध्ये दानपारमिता नं पूर्ण जुयाः बोधिसत्वया आचरणकथं प्राणि मात्रय् बौद्ध धर्म ल्यंका तयेया निंतिं यक्व योगदान बियादी फयेमा। बुद्धत्वया फल प्राप्ति यायेगु लँपुइ सुं हे पंगः व पःखाः जुयाः दं मवयेमा। बौद्ध जगतय् अजीवरत्नकथं पलाः छिनादीम्ह धर्मगुणी जीवरत्न स्थापित स्वदेशय् जक मखु विदेशया कुंकुलामय् थ्यंकं अजर, अमर जुयाः थौं याना वयाच्वंगुया कर्म फलं जीवरत्न जक मखु वय्कःया सकल जहान परिवार सकलें कालान्तरय् बुद्धत्व प्राप्ति जुइमाः धइगु कामना यानाच्वना ।

More Stories Like this