झक्कुयात भक्कु दाल

माधवरत्न 'ख्वबि'

लोडसेडिङ्गया मार, लः मवःगु मार अले संविधान गुगु इलय् निर्माण जुइ धइगु खँय् तःधंगु विवाद जुयाः ततःमतः क्यनाच्वंपिं जनतां जोश पिकाल कि तःधंगु हे ज्वालामुखी विस्फोट जुइफु धइगु बुखँ आः न्हियान्हिथं पत्रपत्रिकाय् पिहां वयाच्वंगु दु ।

वंगु छुं दिं न्ह्यः प्रधानमन्त्री झलनाथ खनालं सरकार दयेकेगु खँय् अलमल यानाच्वन धकाः आक्रोश प्वंकुसें छगू ज्याझ्वलय् वःम्ह एमाले अध्यक्ष झलनाथ खनालयात छम्ह किसानं न्यतालय् मुइका बिल। थुकिं यानाः वय्कलं सार्वजनिक मुद्दा फयाच्वंगु दनि। अय्नं थःत छफुति हे पश्चाताप मदुगु खँ वय्कलं कनादीगु दु ।

हरेक पत्रपत्रिकाय् उकिया बय्बय् जुल। देश-विदेशय् नकारात्मक संकेत पिहां वल। आखिर न्यतालय् नःम्ह झलनाथ हे प्रधानमन्त्री जुल। थुकिं यानाः झलनाथयात दाःम्ह दुर्गाबहादुरया नं हाइ-हाइ जुल। अझ तच्वय्क पत्रपत्रिकाय् 'अय् रेग्मीजु, खापा चायेकादिसँ, जितः नं छत्थु दायादिसँ' धइगु कार्टुन पिहां वल। थ्व ला जुल झलनाथया खँ गुगु थौं क्व नं चायेधुंकूगु दु। थौंकन्हय् ला मेम्ह 'झ' या नेता झक्कु सुवेदीया खँ बय्बय् जुयाच्वंगु दु ।

खँ उकुन्हु वैशाख १९ गतेया खः। एनेकपापाखें येँ २ नं. क्षेत्रय् माधव नेपालयात बुकाः त्याःम्ह झक्कुप्रसाद सुवेदी थःगु छेँय् लिहां वनाच्वंबलय् अन लिक्क कफि पसः तयाच्वंम्ह प्रेमराज देवकोटां सःताः संविधान दयेकेगु ज्या गबलय् क्वचाइ धकाः न्यन। धन्दा कयादी म्वाः, याकनं हे क्वचाइ धकाः सुवेदीं लिसः बिसेंलि देवकोटां अले हानं हलो चले यानाः गनं तक्यंसा छु यायेगु? धकाः न्यन। लिसलय् द्वहंया पनेगु धाल। अले गालय् वनाः तक्यंसा छु यायेगु? धकाः न्यंबलय् सुवेदीं द्वहंया न्हिप्यं म्वय्हीकाः लित हयेगु धाःबलय् अय्सा द्वहं नं थथे दाइ का धकाः नित्थु न्यतालय् दाया बिल। संविधान दयेकेगु ई २५ न्हु जक ल्यं दनिबलय् जनताया हि-चःतिया कमाइलय् मोज यानाः चाःहिलाच्वन, उकिं जोश पिहां वयाः दायागु खः धकाः भाजु देवकोटां बयान बिल। थ्व जिगु व्यक्तिगत वा पार्टीगत वैरभाव मखु। सम्पूर्ण जनतापाखें ६०१ म्ह सभासदतय्त चेतावनी 'झापड' खः धकाः कन। थुकी थःत छुं हे पश्चाताप मदु नं धाल। यदि जनताया अधिकारया निंतिं ज्यान हे बी माःसां नं तयार दु धकाः नं धाल। थुकी वयात कलातं नं समर्थन याःगु जुयाच्वन ।

खय्त ला पासपोर्ट काण्ड, बिजुली खुइगु काण्ड आदिया मार फयाच्वंपिं नेपाली जनता दुने ज्वालामुखी ग्वानाच्वंगु खः। थुकिया विस्फोट दुर्गाबहादुर रेग्मी व प्रेमराज देवकोटां सकल जनताया नेतृत्व यासें पिकया बिल 'झक्कुयात भक्कु दाःगु' खँ। आः थुगु खँ बानेश्वरय् जक मखु नेपाः न्यंकं हे बय्बय् जुयाच्वंगु दु। छगू अजूचायापुगु घटना छु जुल धाःसा तःधंगु दलमध्ये एमालेया अध्यक्ष झलनाथ खनाल व माओवादीया झक्कु सुवेदी 'झ' पाखें सुरु जूगु नां खः। न्हापां ल्हाः नःम्ह प्रधानमन्त्री जुलसा आःयाम्ह ला गनं राष्ट्रपति हे जुइगु खः ला? जनताया तं पिहां वल कि थथे विस्फोट जुइ धइगृु खँ सकल सभासदतय्सं बिचाः यानाः पलाः मन्ह्याकूसा थन न्ह्याग्गुं जुइफु धइगु थ्व संकेत जक खः ।

More Stories Like this