जि हालाच्वनागु थन हे खः[चिनाखँ]

नारद बज्राचार्य

उकिं जि हालाच्वनागु दु-
हालेमाःपिंसं हालाबीमाल
स्यूताःपिंसं कनाबीमाल
न्ह्यलं चाःपिंसं थनाबीमाल
खंपिंसं धयाबीमाल

कि थन-
ख्वबिया सागर धीचिचिउँ वनाच्वंगु दु
स्याःचाःया पहाड तजाजां वनाच्वंगु दु
चिल्लाय्या सः दुसुसुं वनाच्वंगु दु

खः लुखाय् थ्यंक वयाः
जोगि छम्ह हालाच्वंगु दु-
'बाबा !
भाग्यमानि खः छ, म्होस ला ज्वाल्ल थी
खानिया खानि दु, सम्पत्तिया धन्दा मरु
अय्नं खनाच्वना-
भाग्यया लुखाय्-सुपाँय् छकू इरुथिरु
बाबा !
धन्दा कायेम्वाःल छं, वयेधुन जि
छंगु म्हगसयात सुनां नुनाच्वन
सीकेधुन जिं, वया प्राण गुगु ग्वाखंप्वाःचाय् दु
बाबा !
धन्दा कायेम्वाःल छं
उकिया रामबाण बुटी जिके दु'

थम्हं तुं कतांमरिइ मुलुं तियाः
गुब्लें मातंनी जुयाः
गुब्लें पशुपति दर्शन याः वयाः
गुब्लें पासा नालाः
न्हापा नं वःगु खः ।

वःपिंसं
म्वःम्व मोति
प्वःप्वः बुटी बियाः यंकूगु खः ।

आः नं हालाच्वंगु दु -
'बुटी वयाके जक दु
थ्व तःल्वय्या वासः
वया हे फ्याक्ट्रीइ जक दु ।'

जि हालाच्वनागु थन हे खः -
'चायेकि मिखा
वया चिम्तां कताका यंकीन
छंम्ह कामधेनु सा ।'

धयाच्वनागु थ्व हे खः जिं -
मस्यूपिंत स्यूपिंसं सीकाबीमाल
मथूपिंत थूपिंसं कनाबीमाल
द्यंपिंत न्ह्यलं चाःपिंसं थनाबीमाल
लातापिंत बाथातसें धयाबीमाल

नुगः हे तज्याइथें च्वंक
जिगु हीचाः थुलि हे खः -
'मगाःनिला
प्याखं ल्हुइया नामय्
वया पतिंचाय् च्वंगु सुकाय्
थःथम्हं गःपः तःवने मगाःनिला ?'

More Stories Like this