सन्की खुमवहादुरया ख्याच्वः

नेपाली कांग्रेसया पूर्वमन्त्री व नेता खुमवहादुर खड्कां शान्ति व संविधानया नितिं ल्वाःभः ल्होनेगु ख्याच्वः व्यूगु दु । थ्व ख्याच्वः सुइत व्यूगु खः, स्पष्ट मदुसां छताखँ छु स्पष्ट जुल धाःसा नेपाली कांग्रेसया नेता खुमवहादुर खड्काया दिमागय् थें नेपाली कांग्रेसया दिमागय् नं उगुहे कथंया सनकं हे थाय् कयाच्वंगु जकं मखुला ? न्ह्यसः दनावःगु दु । नेपाली कांग्रेसं थःयात प्रजातन्त्रवादी गान्धी वादी, अंहिंसाया पुजारी मस्यु मेगु छुं छुं धायेगु यानावयाच्वंगु दु । थ्व कांग्रेसयाहे थ्व दक्को काइते दिमागयाहे खेल खः । तर शक्ति प्रयोगया भाषाया न्ह्यावलें विरोध यानावयाच्वंम्ह नेता खड्कां कांग्रेसया छु सिद्धान्त व मूल्य मान्यताया आधारय् अथ्य धयावयाच्वंगु खः । थुइके मफु ।

नेपाली कांग्रेसया मूल्य व मान्यता धयागु प्रजातन्त्रं शुरु जुयाः प्रजातन्त्रय्हे अन्त जुइ । राजनीतिइ हिंसायात थाय् मवीपिं कांग्रेसीतय्सं माल धकाः धाःसा हतियार ल्होने धकाः धाल । अथ्य खःसा नेपाली कांग्रेसं माओवादीयात सेना समायोजन यानाः याकनं जनसेना व हतियार पार्टीयात मुक्त यायेमाः धकाः छाय् धयाच्वंगु । शक्ति प्रयोगया विरोध छाय् ? वाइसिएल विघटनया माग छाय् ? कम्युनिष्टतय्सं शक्ति प्रयोग छाय् याइ धाःसा सामन्ती व्यवस्थाय् शासकतय्सं शक्ति प्रयोग यानाः शान्तिपूर्ण जुलुस अधिलनयात नं शक्ति, प्रहरी, सेना प्रयोग यानाः दवय् यायेत स्वइ । शान्ति पूर्ण जुलुस आन्दोलनयात न्ह्यावले शक्ति प्रयोग यानाः दवय् यायेत स्वइगुया लिसः कम्युनिष्टतय्सं नं शक्ति प्रयोगयात सिद्धान्त नालाकयाः व्यवहारय् छ्यलीगु खः । तर गान्धीवादी कांग्रेसतय्सं न्ह्यावलें हिंसाया विरोध यानाः अहिंसाया मन्त्र ब्वनीपिसं हतियार ल्होनेगु ख्याच्वः वीगुया तात्पर्थ छु खः ? थःपिनिगु राजनीतिक मूल्य व मान्यताया अःखः नवायेगु धयागु ला सनक खः, पागलपन खः अले खः गैर राजनीतिक उदेश्यं प्रेरित ज्या । थुकियात मेगु भाषां गैर राजनीतिक अपराध धाइ ।

हतियार ल्होनेगु धयाच्वंम्ह खड्का धात्थेंला हतियार धारी कांग्रेसया अपराधिक पृष्ठभूमिया गुण्डा खः । वयागु पृष्ठभूमियात पुइकाः स्वल धाःसा खड्काया ल्हातं तःम्हं देशया होनहार युवकतय्गु ज्यान काये धुंकूगु दु । १० दँया महान जनयुद्धया झ्वलय् प्रहरी प्रशासन व सेनानाप साथ गाथ यानाः डर्जनौं नेपालीतय्त स्यानाबी धुंकूगु दु । गुलि मुद्धाय् तनं क्यन, तर राजनीतिक दवाव व घुस नकाः मुक्त जुयाच्वंम्ह छम्ह नामुद अपराधी खः खड्का । ल्वाभः ल्होनेगु ख्याच्वः वियाः शान्ति व संविधानया नां कयाच्वंगु दु । ल्वाभः ल्होनाः न शान्ति वइ नत संविधान । हिंसां मखु सहमति व सहकार्यं जक शान्ति व संविधान वइ धकाः वइत सम्झय् याइम्ह सु ?

More Stories Like this