प्रदर्शन स्थलया रुपय् हिलाः वनाच्वंगु न्हूबानेश्वर

येँ (झीगु स्वनिगः)

न्हूगु संविधान जारी जुइ धकाः घोषणा यानातःगु तिथिमिति जेष्ठ १४ गते गुलि गुलि लिक्क लानावल संविधानसभाया भवन दुगु लागा न्हूबानेश्वरय् धाःसा उलि उलि हे छगू कथंया मेला जुयावःगु दु । अन न्हिया न्हिथं प्रदर्शन याइपिं खाली हे जूगु मदु । तःन्हु न्ह्यःनिसें हायण्ड माइक छगः जक ज्वनाः जूसां प्रदर्शन याइपिं अप्वयावःगु दुसा लिपांगु इलय् वयाः ला धर्ना च्वनीपिं तकं झन झन अप्वयाः वःगु दु । अथे प्रदर्शन याइपिं न्हिया न्हिथं हे दयाच्वंगुलिं उगु लागाया लँपु जुइपिनिगु नितिं अन धर्ना च्वन बाय् प्रदर्शन यात धाःसां छुं हे मतलब मयासे वनेगु यानाच्वंगु दु । वंगु बैशाख १ गतेनिसें अन महिला दबाव समुहपाखें न्हिया न्हिथं २ घण्टा तक धर्ना च्वनेगु ज्यायात निरन्तरता बियाः वयाच्वंगु दु । अन मिसात वइगु २ घण्टा च्वनेगु अले लिहां वनेगु छगू कथं अफिसय् हाजीर यायेत वयेथें जुयाच्वंगु दु धकाः स्थानीयवासीं धाःगु दु । वय्कलं धयादी कथं सनिलया ३ ताः ई जुइ धुनेवं छपुचः मिसात वइगु अले इपिं ५ बजे तक संविधानसभाया दक्षिण गेटय् फ्यःतुना धर्ना च्वनेगु अले थवं थवय् खँल्हायेगु नापं म्ये हालाः प्याखं ल्हुइगु बस् लिहां वनेगु यानाच्वंगु दु । इमित अनं ५ बजे जुल कि छुट्टी जुइगु । कन्हय्खुन्हु जुइवं हाकनं अथे हे प्रदर्शन यायेगु इमिगु ज्या हे जुयाच्वंगु दु ।

उगु महिला दबाव समूहलय् थीथी कथंया मिसापिनिगु पुचःत दुथ्यानाच्वंगु दु धकाः इमिसं दावी यानाः वयाच्वंगु दु । उलि जक मखु अन फुर्सत दुपिं मनूत नं वयाः न्ह्यनेलाःथे हालाः जुइगु । गुलिं गुलिं नेता जुयाः भाषण थें यानाः जुइगु । अथे संविधानसभा भवन न्ह्यःने न्हिया न्हिथं प्रदर्शन यायेगु नापं छगू कथं मनूत नापलायेत वयेगु थाय्या रुपय् विकास जुयाः वनाच्वंगु दु । छखे न्हूगु संविधान जेष्ठ १४ गते मवइगु प्रायः निश्चित जुइ धुंकूगु अवस्था दुसा मेखे संविधान दयेकेगु नितिं संविधानसभाया सभासद्पिं मुँज्या च्वनीगु संविधानसभाया पिने हे छगू कथं मेला जुयाच्वंगु खनाः स्थानीय मनूत अजू चायाच्वंगु दु । संविधानसभाया मुँज्या दुसां मदुसां अथे न्हिया न्हिथं जुयाच्वनीगु प्रदर्शन खनाः संविधानसभाया दुजः नापं राजनीतिक दलया नेतातय्गु नितिं नं खास हे चासोया विषय मजुइ धुंकूगु अवस्था दु । थ्व हे दथुइ म्हिगः आइतवाःनिसें पुलांपिं सांसद्तय्गु मञ्चया आह्वानय् भद्र दबाव आन्दोलन धकाः पुलांपिं सांसद्त नं रिले अनसन च्वंवंगु दु । इलय् हे संविधान जारी यायेमाःगु माग यानाः अथे न्हिया न्हिथं जुयाच्वंगु प्रदर्शन नापं पुलांपिं सांसदतय्गु रिले अनसनं छु गज्वःगु लिच्वः लाकीगु खः व धाःसा स्वयेगु ल्यं हे दनि ।