१० गतेया नितिं माओवादीया जन परिचालन

येँ (झीगु स्वनिगः)

एकीकृत नेकपा -माओवादीं) शान्ति, संविधान व राष्ट्रियताया नितिं वइगु जेष्ठ १० गते देय्न्यंकं हे ततःधंगु सभा यायेगु तयारीया झ्वलय् जेष्ठ १ गतेनिसें हे जनपरिचालन याइगु जूगु दु । माओवादीं स्वनिगःया हकय् १० गते येँया खुल्लामञ्चय् तःधंक जनसभा यानाः शान्ति, संविधानया नितिं थःपिन्सं यानाच्वनागु कुतः नापं वयाच्वंगु पंगःयात कयाः नापं प्रतिक्रान्तिकारीत सक्रिय जुयाः वयाच्वंगु विषयसं थःपिनिगु धारणा तयेगु कथंया जनसभा यायेगु ग्वसाः ग्वयातःगु दु । उगु जनसभाय् माओवादीया नायः पुष्पकमल दाहाल प्रचण्ड मूपाहां जुयादीगु जूगु दु ।

उगु जनसभायात ताःलाकेगु नितिं माओवादीपाखें जेष्ठ १ गते विद्यार्थीत परिचालन याइगु जूगु दु । अथे हे ३ गते सांस्कृतिक मोर्चा परिचालन, ४ गते किसान, सुकुम्वासी परिचालन, ५ गते जाति, क्षेत्र, महिला, मुस्मां, दलित परिचालन अथे हे ७ गते बुद्धिजीवी व प्राध्यापक परिचालन नापं ८ गते जनस्वयं सेवक परिचालन यायेगु ज्याझ्वः तयार याःगु दु । उगु हे कथं मजदुरतय्त नं माःगु कथं परिचालन याइ धाःगु दु । अथे हे १० गते देय्या मूमू शहरय् ततःधंगु जनसभा यायेगु नितिं नं माओवादीं उगु हे कथं थाय् थासय् जन परिचालन याइ धकाः माओवादीया छम्ह नेतां जानकारी बियादीगु दु ।