'संविधानया नितिं सर्त'

येँ (झीगु स्वनिगः)

न्हूगु संविधानया मस्यौदा तयार यायेत नापं संविधानसभाया म्याद थप यायेगु नितिं नेपाली कांग्रेस नापं एमालेया केपी शर्मा ओली व माधव कुमार नेपाल पक्षधरया नेतातय्सं माओवादीया सेना समायोजनया सर्ट न्ह्यःने तःगु दु । यदि आःया अवस्थाय् सेना समायोजनया खँ न्ह्यात धाःसा थःपिन्सं संविधानया मस्यौदा जेष्ठ १४ गतेया दुने दयेकेत तयार धकाः सर्ट खुल्ला रुपं हे तयाहःगु दु । म्हिगः आइतवाः हे नेपाली कांग्रेसया सभापति सुशील कोइराला व एमालेया बरिष्ठ नेता माधवकुमार नेपालं ब्यागलं ब्यागलं ज्याझ्वलय् न्वंवायेगु झ्वलय् संविधानया नितिं अथे सर्त तयादीगु खः । संविधान जारी यायेगुसिबें नं संविधानया एकीकृत मस्यौदा तयार यानाः जनतायाथाय् यंकेत हे अथे सेना समायोजनया सर्त तयाहःगु खः ।

उलि जक मखु माओवादीयात बियावयाच्वंगु सम्पत्ति कब्जाया खँ नं आः वयाः इपिं नेतातय्सं सर्तया रुपय् न्ह्यःने तयाहःगु दु । इमिसं छुं दिंया दुने हे सेना समायोजनया सवालय् थःपिन्त चित्तबुझेजूगु कथंया सेना समायोजनया ज्या न्ह्याकल धाःसा संविधानया मस्यौदा तयार यायेत नापं संविधानसभाया म्याद थप यायेत तयार धकाः धयादीगु खः । थ्व हे दथुइ मधेसवादी दलया नेतातय्सं नं थ्व हे इलय् दुई तिहाई बहुमतया आधारय् न्हूगु संविधान जारी यात धाःसा उकियात स्वीकार यायेफैमखु बरु आन्दोलनय् वनेगु धकाः ख्याच्वः तकं ब्यूगु दु । मधेसवादी दलया नेतातय्सं म्हिगः हे पत्रकार सम्मेलनय् न्वंवायेगु झ्वलय् अथे ख्याच्वः बियाहःगु खः ।

विशेष यानाः वर्तमान सरकारय् एकीकृत माओवादी, एमाले, मधेसी जनअधिकार फोरम, नेकपा -संयुक्त) दुथ्यायेवं आः संविधानसभाया दुई तिहाई बहुमत दइगु जुल धकाः हीमी चाया अथे आक्रमक रुपं प्रस्तूत जूगु खः धकाः मनूतय्सं तिप्पणी यानाहःगु दु ।