मिसा सांसद्त आन्दोलित

थौं रोस्टम घेराउ यायेत निथ्वः सांसदतय् तयारी

येँ (सन्ध्या टाइम्स)/थौं सनिलय् न्हूबानेश्वरया संविधानसभा भवनय् ३ बजेनिसें न्ह्याइगु व्यवस्थापिका संसदया बैठक न्ह्यायेवं हे सांसद्तय्गु निगू पुचलं रोस्टम घेराउ यायेगु तयारी याःगु दु ।

संविधानसभाया संवैधानिक समितिनिसें संसदय् तकं आन्दोलन यानाः रोस्टम घेराउ याना वयाच्वंपिं राज्यं बहिष्करणय् लाकातःपिं प्यम्ह सभासद्पिंसं न्हापा थें हे थौं नं संसद्या मुँज्या न्ह्यायेवं हे रोस्टम घेराउ यायेगु तयारी यानाच्वंगु दुसा अथे हे मिसापिं सांसद्तय्सं नं रोस्टम घेराउया तयारी यानाच्वंगु दु। वंगु छुं दिं न्ह्यः जक दयेकूगु 'मन्त्रिपरिषद, संवैधानिक निकाय लगायत राज्यया फुक्क क्षेत्रय् तत्काल न्यूनतम ३३ प्रतिशत मिसापिं सहभागिता, न्हूगु संविधानय् समानुपातिक समावेशीया सिद्धान्तया आधारय् सहभागिता व लैंगिक समतामुखी संविधानया सुनिश्चितताया लागिं संयुक्त महिला संघर्ष संयोजन समिति'पाखें रोस्टम घेराउ यायेगु ज्याझ्वः दयेकूगु खः। उगु संघर्ष संयोजन समितिइ राष्ट्रिय महिला आयोग, अन्तरपार्टी महिला संजाल व मिसापिं सभासद्तय्गु दबाब पुचः ककस दुथ्यानाच्वंगु दु ।

अन्तरिम संविधानय् हे ब्यवस्था यानातःगु कथं राज्यया नीति निर्माण व कार्यान्वनया क्षेत्रय् ३३ प्रतिशत मिसापिं तयेगु व्यवस्था यानातःगु जूसां उकियात कार्यान्वयन मयाःगु नापं लिपांगु इलय् वयाः मन्त्रीमण्डल विस्तार याःगु इलय् तकं मिसापिंत माःगु कथं प्रतिनिधित दुमथ्याकूगुलिं एकीकृत माओवादीया मिसापिं नेतातय्गु पहलय् अथे संघर्ष समिति दयेकाः मिसापिं सतकय् कुहां वःगु खः ।

थ्व हे दथुइ उगु संयुक्त महिला संघर्ष संयोजन समितिपाखें कार्यवाहक उपप्रधानमन्त्री भरतमोहन अधिकारीयात विरोध पत्र बीगु तकं ग्वसाः ग्वयातःगु दु ।

पुलांपिं सांसदत रिले अनशनय्
क्वःछिनातःगु इलय् हे न्हूगु संविधान जारी यायेमाः धकाः माग यानाः पुलांपिं सांसदतय्गु मञ्चया आह्वानय् थनिनिसें पुलांपिं सांसदत संविधानसभाया भवन पिने रिले अनसश च्वंगु दु। भद्रदबाब आन्दोलन धकाः अथे पुलांपिं सांसदत रिले अनसन संविधानसभाया पक्षिम गेटय् च्वंगु खः। जनतां संविधानसभायात बिउगु निदँया म्याद फुनाः दच्छि थप याये धुंकूगु अवस्थाय् आः तक नं न्हूगु संविधान वइगु अवस्था मवःगुलिं संविधानसभाया दबाब बिइगु नितिं धकाः अथे अनशन च्वंगु खः ।