विदेशी दलाल विरुद्ध फुक्क छप्पँ जुइमाः

डी.आर.खड्गी

बैशाख १५ गते 'सन्ध्या टाइम्स'नाप खँल्हाबल्हाया क्रमय् नेपाल वायुसेवा निगमया कार्यकारी अधिकारी सुगतरत्न कंसाकारं दुःख मनं प्रस्तुत याःगु खँ देशभक्त जनतायात मनय् च्वास्स जुइगु स्वाभाविक खः। सुगतरत्नं प्रत्यक्ष रुपं मखु अप्रत्यक्ष रुपं धायेगु यात नेपाःया सत्ताय् स्वार्थी 'लोभी नेतात' विदेशीया ईशाराय् प्याखं हुलाः देश स्यंका जक च्वंगु मखु अझ माफिया जालय् लानाः देशयात याकनं तहसनहस यायेत स्वयाच्वंगु दु। सुगतरत्न बांलाःम्ह व्यवस्थापक खः धकाः दक्षिण एशियाय् अतिकं चर्चा जुयाच्वंम्ह व्यक्तित्व खः। भ्रष्टाचार व कमिशनया खेलय् लानाः ध्वस्त जुयावनाच्वंगु दुर संचार संस्थानयात ठिक थासय् हयाः प्रत्येक नागरिकया ल्हातय् मोबाइल फोन थ्यंकेत सफल जूम्ह व्यक्ति खः। अझ थुलि जक मखु गां गामय् नं इन्टरनेट सेवा व मोबाइल फोनया सेवा बिया बीत सफल जूगुलिं झीगु देशय् जक मखु दक्षिण एशियाय् सफल व्यवस्थापन व्यक्ति खः धकाः चर्चा जूगु खः। स्यना वनाच्वंगु दुर संस्थानयात नाफाय् यंकाः दँय् झिगू अरब जक राजस्व पुलाच्वंगु संस्थानं छकलं नीनिगू नीप्यंगू अरब राजस्व पुलाः देशया नम्बर वान बांलाःगु संस्थान खः धकाः जनतां धायेगु यात। जब सरकार फेरबदलया क्रमय् हानं दुरसंचार संस्थानया जिम्मा भ्रष्ट नेतातय्गु ल्हातय् वंगुलिं सुगतरत्नयात दिक्क यायेगु यानाः वय्कः छेँय् आराम कायेत बाध्य जुल। हानं छुं महिना लिपा हिसिला यमि पर्यटन मन्त्री जुइत सफल जुइसातकि काण्डै काण्ड जुयाः ध्वस्त जुयाच्वंगु नेपाल वायु सेवा निगमया कार्यकारी अधिकारी नियुक्ति यानाबिल। काण्डै काण्ड जुया स्यना वनाच्वंगु वायु सेवा निगमयात भ्रष्टाचार व कमिशनया खेलं मुक्त यानाः निगमयात नं सुधार यायेगु कुतः याना वनाच्वंगु खः। पर्यटन वर्ष सफल यायेगु लागिं निगमयात तःधंगु जिम्मेवारी वयाच्वंगुलिं निगः जहाज न्यायेगु लागि एअरबस कम्पनीयात न्यागू करोड ध्यबा बैना छ्वःगु खः। बैना छ्वःगु ध्यबां भ्रष्टाचार यात धकाः भ्रष्ट नेता व माफिया मिले जुयाः कंसाकारयात फँसे यायेत तःधंगु षडयन्त्र शुरु यात। कंसाकारयात मुद्दाय् फँसे यानाः वय्कःया व्यक्तित्वयात जक ध्वस्त यायेत स्वःगु मखु निगमयात तकं ध्वस्त यानाः निजीकरणय् यंकाः अझ तःधंगु भ्रष्टाचार व कमिशन नयेत स्वःगु खः ।

सुगतरत्न कंसाकारयात भ्रष्टाचार यात धकाः लेखा समिति व अख्तियार दुरुपयोगु आयोग मिले जुयाः षडयन्त्र याःगु निगू कारण खनेदु। छगू कारण खः न्हापा खस ब्रम्हूतय्सं थें धमिजा काण्ड, लाउडा काण्ड व चेजएअर काण्ड थें भ्रष्टाचार यात धकाः खःसा मेगु कारण लेखा समिति व अख्तियारदुरुपयोगया सदस्यतय्त नं कमिशन मबिल धकाः खः। कंसाकारयात मुद्दा तःगु इलय् हे जिं लेख मार्फत सचेत यानागु खः कंसाकारयात पँ्कस यायेफु धकाः। आखिरय् वय्कःयात जेलय् तकं कुना बिल। माफियातय्सं न्यायपालिका, कार्यपालिका व व्यवस्थापिकायात तकं थःगु ल्हातय् तयाच्वने धुंकूगुलिं जिं अथे च्वयागु खः। कंसाकारया केशं नं क्यं, खसब्रम्हु नेतात व मधेशीवादी नेतात गुलि शक्तिशाली जुइधुंकल धयागु खँ। बरु एअर बस कम्पनीं बांलाःम्ह व्यक्तियात फँसे याइन धकाः एकाउण्ट नम्बर छ्वया हयेत इनाप यातं नं वायुसेवाया छपुचः भ्रष्ट नोकरशाहतय्सं अख्तियार दुरुपयोग आयोग व लेखा समितिनाप सल्लाह यानाः जक के.बी. लिम्बुं एकाउण्ट नम्बर छ्वःगु खः। बैना लित काये न्ह्यः तकं ब्याज सहित बैना लित माः धकाः षडयन्त्र यानाच्वन। थज्याःगु घृणित षडयन्त्रं छु क्यनाच्वंगु दु धाःसा नेपाःया सत्ताय् भ्रष्ट नेतातय्त नं प्याखं हुइका च्वनीपिं माफियात यक्व हे दु खनिं। यदि स्वनिगःया नेवाःत व वायु सेवा निगमया कर्मचारीतय्सं आन्दोलन मयाःगु जूसा कंसाकारयात जेलय् कुनां तुं कारवाही यानाच्वनीगु जुइ ।

सुगतरत्न कंसाकारं थ्व नं दुःख प्वंकादिल कि लुम्बिनी विकास कोष पीदँ न्ह्यः स्थापना जूगु खः, लुम्बिनी विकास कोषयात अर्बौ अरब सहयोग वयेधुंकल तर लुम्बिनीया हालत सुधार जुयाच्वंगु खने मदु। खालि दश प्रतिशत जक ज्या जुयाच्वंगु खनेदु धयादिल।शाह वंशीय शासनया इलय् नेतातय्सं धायेगु याइ जुजु सामन्तीया नाइके जूगुलिं देश विकास मयासे थःगु स्वार्थ जक पुरा यानाच्वन धकाः द्वपं बीगु यानाच्वनी। देशय् शाह वंशया शक्ति माइनस जुइधुंकलं नं देश विकास मखु झन् स्यना वनाच्वंगु दु। लुम्बिनी विकास कोषया लागि जक करोडौं करोड विदेशं सहयोग वलं नं विकास मयासे ध्यबा जक बर्बाद याना वयाच्वंगु दु। वंगु दँय् चीनया निजी संस्था गौतम बुद्धया जन्मस्थलयात अन्तर्राष्ट्रिय बौद्ध केन्द्र यायेगु लक्ष्य ज्वनाः च्यागू अर्ब तका खर्च यायेगु घोषणा याःगु खः। चीनया संस्था सन् २०१५ सालया दुने लुम्बिनी परियोजना सम्पन्न यानाः संसारया बुद्धिष्टतय्गु लागि लुम्बिनी आकर्षण केन्द्र यायेगु लक्ष्य तःगु खः। यदि थ्व योजना पुरा जुइगु खःसा गथे क्रिश्चियनया लागि भेटिकन सिटी, मुश्लिमया लागिं मक्का पवित्र स्थल जू थें बुद्धिष्टतय्गु लागि लुम्बिनी पवित्र जन्म स्थल जुइगु खः। यदि थ्व योजना सफल जूगु खःसा दँय्दसं हजार जक मखु लाखौं लाख पर्यटक लुम्बिनी वयेफु। तर दुर्भाग्य थ्व योजनायात थनया भ्रष्ट नेतातय्सं असफल यानाबिल ।

थ्व पक्का खः झीगु देय् गरिब मखु देय्यात गरिब यानाच्वंपिं भ्रष्ट व लोभी नेतात खः। शाह वंश पंचायतया इलय् शासकत विदेशी भक्त उलि जूगु खने मदु। पंचायत इलय् देशभक्त सकारात्मक विवेकी मनूतय्त माइनस याना यंकेगु मस्वः बरु प्रोत्साहन बियाः ज्या यायेगु अवसर बीगु यानाच्वनी। जब विदेशीभक्त खसब्रम्हू नेतातय्गु ल्हातय् सत्ता लात इमिगु ज्या भ्रष्टाचार व कमिशन नयां मगानाः देशया प्राकृतिक सम्पत्ति विदेशीतय्त अधिकार बिया वनाच्वन। अझ थुलि जक मखु देशभक्त व बांलाःपिं नेता व व्यक्तितय्त नं माइनस यायां वनाच्वंगु कारणं यानाः देशया अवस्था भयावह जुया वनाच्वंगु खः। यदि झी फुक्क छप्पँ जुयाः भ्रष्ट व विदेशी दलाली याइपिं नेतातय्त माइनस याये मफुत धाःसा देश तकं उपनिवेशय् मलाइ धकाः धाये मफु ।

More Stories Like this