पेट्रोलय् बीत्यंगु निगू अर्बया अनुदान

देशय् जुयाच्वंगु पेट्रोलियम पदार्थया अभाव म्हो यायेगु लागिं सरकारं निगू अर्ब तका अनुदान बीगु जुल धकाः निर्णय याःगु दु। थुकिं यानाः छुं मखुसां मेगु लत्या तक देशय् पेट्रोलियम पदार्थया वितरण सुलभ जुइगु आशा जूगु दु ।

खतुं पेट्रोलियम पदार्थ झिके यायेत सरकारं निगू अर्ब तका अनुदान बिउगु थ्व ज्यायात 'कुँइ ध्यबा फुकेगु' धकाः आलोचना याइपिं नं थ्व देशय् मदुगु मखु। खास यानाः पेट्रोल प्रयोग याइपिं अधिकांश मनूत शहरय् च्वनीपिं जूगु कारणं उमिगु लागिं सरकारी धुकुतिं अनुदान बीगु पाय्छि मखु धाइपिनिगु तर्क खः थ्व। तर यथार्थ छु धायेबलय् थ्व पेट्रोल छ्यलीपिं उपभोक्तातय्सं सरकारपाखें निगू अर्ब तका अनुदान काःसां सरकारयात १६ अर्ब तका कर नं पुलाच्वंगु दु। पेट्रोलय् सरकारं प्रति लिटर १३ तका धइथें कर कायेगु यानाच्वंगु दु। पेट्रोल खपट याइपिंपाखें काइगु करयात सरकारं गामय् नं अवश्य छ्यलाच्वंगु दयेमाः। उकिं आवश्यक जूगु इलय् बिउगु अनुदानयात शहरियातय् लागिं छ्यःगु ध्यबा धायेगु उचित मखु। बरु थ्व खँ खः कि पेट्रोलय् अथे अनुदान हे बी म्वायेक गज्याःगु पलाः ल्ह्वनेगु खः, उखेपाखे कुतः यायेमाःगु दु। पेट्रोल नेपालय् दुगु वस्तु मखु। उकिं थुकिया उपभोग फयांफछि म्हो याये माल। थुकिया लागिं मनूतय्त मोटर, मोटरसाइकल सिबें साइकल गयेत प्रोत्साहन बीगु, जलविद्युतया उत्पादन अप्वयेकाः विद्युतीय सवारी साधन प्रयोगय् हयेगु, निजी सिबें सार्वजनिक सवारीयात अप्वः महत्व बीगु आदि छुं अज्याःगु उपायत खः। थुखेपाखे आवंनिसें हे छुं ज्या जुल धाःसा निदँ प्यदँ ला अवश्य नं सफल जुइ। न्हापां 'न्हापांगु पलाः' निं ल्ह्वने माल ।

More Stories Like this