लगातार प्रदर्शन यायेत जनजातित छप्पँ

च्याम्ह दुजः तयाः तदर्थ समन्वय समिति गठन

येँ (झीगु स्वनिगः)

जातीय स्वायत्त प्रदेशत निर्माण यायेमाःगु माग यानाः आन्दोलन यायेगु नितिं नेपाःया आदिवासी जनजातितय्गु मंकाःगु संघर्ष समिति दयेकेत च्याम्हेसिया तदर्थ समन्वय समिति नीस्वंगु दु । उगु तदर्थ समितिइ एकीकृत नेकपा -माओवादी)या जातीय महासंघ, नेपाली कांग्रेसया जातीय संगठन, एमालेया जातीय महासंघंनिसें चिचीधंगु जातीय राजनीतिक दलत नापं आदिवासी जनजातिय्गु थीथी संगठननिसें नेवाः व तामाङतय्गु संघर्ष समिति तकं दुथ्याकूगु दु । नेवाः—ताम्सालिङ संयुक्त संघर्ष समितिया ग्वसालय् वंगु शुक्रवाः आदिवासी जनजातिया खलः पुचः नापं राजनीतिक दलया जातीय मोर्चातय्गु मंकाः मुँज्यां अथे मंकाः कथं आन्दोलन न्ह्याकेत उगु कथं समन्वय समिति गठन याःगु खः ।

उगु समन्वय समितिया दुजलय् एकीकृत माओवादीया आदिवासी जातीय क्षेत्रीय महासंघ, एमालेया नेपाल लोकतान्त्रिक महासंघ, कांग्रेसया लोकतान्त्रि संघ, चिचीधंगु जातीय राजनीतिक पार्टीपाखे, नेपाल आदिवासी जनजाति महासंघ, नेवाः स्वायत्त राज्य मंकाः संघर्ष समिति, ताम्सालिङ संघर्ष समिति, महिला महासंघया छम्ह/छम्ह प्रतिनिधित दुथ्याकूगु दु । उगु मुँज्यां नेपाःया आदिवासी जनजातिय्सं ब्यागलं ब्यगालं कथं यानाच्वंगु आन्दोलनयात एकीकृत यानाः वनेगु नापं संविधानसभायात निरन्तर घेराउ यायेगु नापं येँय् प्रदर्शन यायेगु नितिं संघर्षया ज्याझ्वः तयार यायेगु धकाः नं खँ क्वःछ्यूगु दु । अथे निरन्तर संघर्षया नितिं वइगु बैशाख २७ गते उगु तदर्थ समन्वय समितिया मुँज्या च्वनेगु धकाः तकं खँ क्वःछ्यूगु खः ।

नेवाः—ताम्सालिङ संयुक्त संघर्ष समितिपाखें वंगु बैशाख १४ गते नेवाः व ताम्सालिङ प्रदेश बन्दया झ्वलय् नेपाःया आदिवासी जनजातिय्गु मंकाः आन्दोलन न्ह्याकाः यंकेत माःगु कुतः यायेगु धकाः घोषणा याःगु कथं हे वंगु शुक्रवाः नेपाःया आदिवासी जनजातिय्गु थीथी खलः पुचः व संघर्ष समितिया मंकाः मुँज्या च्वनाः अथे खँ क्वःछ्यूगु खः । इलय् हे संविधान जारी यायेमाःगु, आत्मनिर्णय नापं जातीय स्वायत्तता व स्वशासन दुगु प्रदेशत निर्माण यायेमाःगु, पूर्व सुसुचित जानकार मन्जुरी कार्यान्वयन यायेमाःगु नापं थीथी कथंया मागत तयाः अथे आदिवासी जनजातितय् मंकाः आन्दोलन न्ह्याकेत मंकाः मोर्चा दयेकाः न्ह्याः वनेगु धकाः तकं खँ क्वःछ्यूगु दु ।