सभासद् थ्वं कायेकाः लँय् हे तमासा क्यन
येँ (झीगु स्वनिगः)
देय्या न्हूगु संविधान दयेकेत वंम्ह छम्ह मिसाम्ह सभासद्ं थ्वँ अय्लाः त्वनाः लँय् हे न्ह्यनेलाःथे सनाजुल धकाः धायेबलय् मनूत पत्याः मजुइफु । तर नेकपा माले समाजवादीया सभासद् सारदा नेपालीं धाःसा म्हिगः शनिवाः अथे तामासा क्यंगु दु । नेपालगन्जय् अर्धबेहोस अवस्थाय् तामासा क्यंगु खः । पार्टीया अप्वः लेवी पुलेमाःगु धकाः छुं ई न्ह्यः आत्महत्या नितिं विष तकं नयादीम्ह सभासद् नेपालीं आः वयाः लँ दथुइ हे थ्वं कायेकाः न्ह्यनेलाःथे सनाजूगु खनाः स्थानीय मनूत अजूचाःगु दु । थ्वँकाःम्ह सभासद् सारदा सुथ न्हापां हे अनया पुष्पलाल चोकय् वंगु खः । न्यू नेपाल गेष्टहाउसय् थः भात नाप द्यनाः सुथय् जुइवं थः असुरक्षित जुल धकाः अन चोकय् च्वंगु पुलिसया बुटय् वनाः सुरक्षाया माग याःवंगु खः ।
धाः कथं छपा ल्हाःतं पाइन्ट ज्वनाः मेगु ल्हाःतं मोबाइलय् फोन नम्बर डायल हे मयासे घण्टौं तक मोबाइलय् खँ ल्हानाः तामासा क्यनेगु ज्या यात । थ्वँकाःम्ह सभासद् नेपालीं थःत थः भातं स्यायेत्यंगुलिं थ्वँ कायेक त्वनागु खः धयादीगु दु । बर्दियाय् ग्वसाः ग्वःगु छगू ज्याझ्वलय् ब्वति कायेत वंम्ह सभासद् नेपाली गबलें रिक्साय् थाहां वनेगु अले गबलें रिक्सां क्वहां वयेगु यनाच्वंगुलिं स्थानीय मनूत अजू चाल ।
