'राष्ट्रसंघपाखें हस्तक्षेप’

राष्ट्रसंघया द्वपंप्रति दर्जनौं संस्थापाखें आपत्ति

येँ (झीगु स्वनिगः)

सूचना तथा संचारमन्त्री अग्नि सापकोटां मानव अधिकारया नामय् संयुक्त राष्ट्रसंघं नेपाःया राजनीतिइ हस्तेक्षप यानाच्वन धकाः धयादीगु दु । म्हिगः शनिवाः साक्षात्कार ज्याझ्वलय् न्वंवायेगु झ्वलय् मन्त्री सापकोटां धयादिल 'स्वार्थवस याःगु रिपोर्टिङया आधारय् राष्ट्रसंघ थें जाःगु गरिमामय संस्थां विज्ञप्ति पिकाये मजिउगु खः, थुकिंयानाः राष्ट्रसंघया गरिमाय् हे नकारात्मक लिच्वः लाइ ।' घटनायात ल्ह्वनाः मानवअधिकारया नामय् नेपालय् राजनीतिक हस्तक्षेप याःगु खँ न्ह्यथसें अज्वःगु कथंया ज्या गुगु नं हालतय् स्वीकार याये फैमखु धकाः नं धयादिल । संविधानसभायात प्रभावित यायेगु नितिं थःत मानवअधिकार उल्लंघनया द्वपंब्यूगु खः धकाः दावी यानादिसें वय्कलं राजनीतिक पूर्वाग्रहपाखें उगु खँ पिहां वःगु खः धयादिल । सन् २००५ सं अर्जुन लामाया अपहरण यानाः हत्या याःगुया धलखय् प्रहरीं सापकोटाया नां सार्वजनिक याःगु खः । थ्व हे दथुइ नेपाःया मानवअधिकारवादी नापं थीथी सामाजिक व पेशागत संगठनतय्सं म्हिगः शनिवाः मंकाः कथं विज्ञप्ति पिथनाः सूचना तथा संचारमन्त्री अग्नि सापकोटायात राष्ट्रसंघं ब्यूगु द्वपंयात कयाः आपत्ति प्वंकूगु दु ।

मानव अधिकार तथा समाजिक रुपान्तरण अभियान नेपालया न्वकु वासुदेव सिग्देल, जनअधीकार सरोकार केन्द्रया न्वकु बोर्णबहादुर कार्की, महिला आधारशिला केन्द्रया अध्यक्ष रेणु उप्रेती, मानव अधिकार तथा सामाजिक रुपान्तरण अभियानया छ्याञ्जे बालकृष्ण देवकोटा, भेरी वातावरणिय विशिष्टता समूहया कार्यकारी निर्देशक गोपालनाथ योगी, सार्वजनिक वकालत केन्द्रया नायः एस के सुवेदी, डेभलपमेन्ट लयर्स एसोसियसनया मूछ्याञ्जे रविन सुवेदी, मानवअधिकार तथा मानविय कानुन अभियानया निर्मला सिटौला नापं थीथी संघ संस्थां मंकाः कथं विज्ञप्ति पिथनाः अथे आपत्ति प्वंकूगु खः । विज्ञप्तिइ मन्त्री सापकोटायात छुं नं ठोस प्रमाणया आधारय् गनं नं उजुरी तकं मदुगु खँ न्ह्यथनातःगु दु । अथे हे संयुक्त राष्ट्र संघीय मानव अधिकार उच्चायुक्तया ज्याकूथें जाःगु संस्थायात सत्य तथ्यया आधारय् मजूसे हचुवा कथं राजनीतिक पूर्वाग्रह तयाः अथे द्वपं ब्यूगुलिं थःपिनिगु ध्यानाकर्षण जूगु नापं अज्वःगु वक्तब्य जारी मयायेत इनाप याःगु दु ।