न्यायाधीस[बाखं]

मीना वज्राचार्य

- "न्यायाधीसजु, जितः न्याय बियादिसँ ।"
- "जज साहेब, जिगु मुद्दा छकः छिनेयाना बीमाल ।"
- "न्यायाधीसजु, थौंया ज्याझ्वलय् छिं निर्णय बियादी माल ।"
- "न्यायाधीसजु, गथे याःसा जी -"
- "जज् साहेब, नमस्कार ...... !"
"न्यायाधीसजु थ्व यायेमाल, व यायेमाल, गुबलें मुद्दा स्वयेमाल ।" थज्यागु हे थीथी सः थ्वयाच्वनीगु खः, न्हिं न्हिं न्यायाधीसया छेँय्, अफिसय्, फोनय् मोबाइलय् अले अदालतय् तक्क । वं सकसिगुं खँयात बांलाक ध्यान तयाः न्यनाबी । सुयातं निराश याइमखु ।

व छम्ह नां जाःम्ह न्यायाधीस खः । वं याइगु निर्णय सकसितं चित्तबुझे जू । छाय्धाःसा वं न्याय याइबलय् सु तःमि, सु चीमि, सु बल्लाः, सु बमलाः स्वइमखु । गुबलें वयात सुनानं धेबां न्याना कायेमफु । डर, त्रास, धम्की बियाः न सुनां ख्याये हे फु । व सुयागुं पक्षय् च्वनीम्ह मखु । तथस्त जुयाः न्ह्याबलें निस्पक्ष रुपं दुरुया दुरु लःया लः छुटे जुइक फैसला याइ । उकिं न्यायाधीसया नां देशय् जक मखु विदेशय् तक्कं बय्बय् जू । अदालतय् जक मखु, त्वाःबा, सभा समारोह वा छुं नं कथंया ज्याझ्वलय् नं वयात मन्यंक छुं याइमखु । वयागु निर्देशनय् ज्या यात धाःसा ताःलाइ धयागु सकसियां मान्यता दु । वं याइगु निर्णय सुयातं घाः लाकी मखु, अन्याय जुइमखु धकाः दक्वसियां स्यू । वं न्ह्याबलें सत्यया पक्ष च्वनाः जक न्याय बी । सुयातं दुःखी, निराश व अन्याय जुइके बीमखु ।
- दाजु, जितः थ्व हयाबी माल ।
- दाजु, जिमित विदेश वनेत धेबा माल । छेँय् खर्च यायेत धेबा माल ।
- बाबु जिगु वासः फुत । क्यं वनेमाल ।
वयागु छेँय् न्ह्याबलें थ्वया च्वनीगु सः खः, थ्व ।

न्यायाधीस नकतिनि झिंन्यादँ दुबलय् वया अबु मदुगु खः । उबलय्निसें हे वं अबुया दायित्व निर्वाह याना वयाच्वंगु दु । मानौं व छम्ह वया छेँय् जःपिनि अभिभावक खः । अबुम्हं दक्व भार वयात क्वबिकाः थः र्स्वर्गय् जुल । उबलेनिसें हे वं अभिभावकत्वया बोझ कुबिया वयाच्वन । थः परिवारयात सेवा यायेगु, लालन पालन यायेगुनिसें कयाः केहेँ किजापिन्त आखः ब्वंकेगु, इमिगु विधि ब्यवहार यायेगु नापं मांया तुतां जुइगु दक्वं तःधिकःम्ह काय् जूगु नातां वयागु हे कपालय् लात । वं तसकं दुःखसियाः ज्या यानाः आखः नं ब्वनाच्वन । वयागु मेहनतया फलं आखिर व न्यायाधीस जुल । वया केहेँ किजापिन्त नं इमिगु इच्छाकथं आखः ब्वंकातल । अय्नं वं छुं थाकु मचायेकू, दुःख मचायेकू । थःगु धर्म व कर्तब्य भाःपाः दक्व यानाः वयाच्वन ।

सी न्ह्यः न्यायाधीसया अबुं वयात छगू बचं नं ल्हाकुगु जुयाच्वन । "बाबु जि मदयेधुंकाः छं मां व केहेँ किजापिन्त दुःख बीमते । इमिगु मिखां ख्वबि गुबलें हायेके बीमते ।" अबुयात बचं बियाकथं वं थःगु धर्म पालना यानावया च्वन । मां व केहेँकिजापिन्सं धाःधाःथे पुरेयाना वयाच्वन । थःगु इच्छा आकांक्षा ल्हाकाःसां इमिगु इच्छा विपरित वं छुं मयाः । उकिं सकल छेँय् जःपिं न्यायाधीस खनाः तसकं लय्ताः ।

दिं न्ह्यानाच्वन । इकथं सकसियागु इहिपा जुल । छेँय् स्वम्ह भौपिं दुहाँवल । निम्ह केहेँपिनि नं इहिपा सिधल । दक्वसियां थःपिनिगु इच्छाकथं न्यायाधीसयाके माग पूवंके बियाच्वन । सकल छेँय् जःपिं थःपिन्त कतिलाकेगु व लबः कायेगुलिइ हे ब्यस्त जुयाच्वन । छेँय् पिने सकसिगुं जज जुयाः ज्या यानावया च्वंम्ह व थःगु छेँय् धाःसा गुबलें जज जुइमखं । न्ह्याबलें इमिगु हुकुम जक न्यनाः ज्या यानाच्वन । न्यायाधीसयागु इच्छा, आकांक्षाया बारे सुनां च्यूताः नं तःगु मदु । अथेसां वं छुं दुःख मतायेकू । थः परिवारया इच्छा आकांक्षा व लसता हे थःगु नं लसता भाःपियाः लय्ताया च्वन । तर थज्याःगु खं यानाः वया कलाः धाःसा लय्मताः । वं थःपिनिगु नं इच्छा आकांक्षाकथं ज्या जुइमाःगु व थःपिन्त नं लवः कायेखनेमाःगु भाःतया न्ह्यःने -न्यायाधीसया न्ह्यःने) तल । थःपिन्त जूगु अन्याय व अत्याचारया विरुद्ध सः तयेगु तःक्वः कुतः यात । तर दक्वसित न्याय बिया जुइमाःम्ह न्यायाधीसं कलाःयात जक मखु थःगु जिन्दगीयात नं न्याय बीफया च्वंगु मदु । थःगु छेँय् न्यायाधीस जुयाः निर्णयवं आःतक याःगु नं मदुनि । न्ह्याबलें मां व केहेँकिजापिनिगु आज्ञा शिरोपर यानावया च्वन ।

न्यायाधीसयात याइगु ब्यवहारं कलाम्ह दिक्क जुल । -थ्व खँयात कयाः) गुलि धाल नं कलाःया खँ न्यायाधीसं मताः छु यानाः चुपचाप सहयाना च्वन । उकिं वया कलाःम्ह आः परिवारया जःलिसे स्वयां थःहे भाःत न्यायाधीस नापं विद्रोह यानाहयेगु यात । कलाःम्हं न्हिंन्हिं कचकच यानाच्वन । अय्नं वं छेँय् जःपिन्त छुं धायेमफु । व बचनबद्ध जुयाः मौनब्रत च्वना च्वनेत बाध्य जुयाच्वन । आखिर ल्वापु जुजुं छन्हु कलाःम्हं न्यायाधीसयात डिभोर्स यानाः पाचुकल । आः न्यायाधीस याकःचा जुल । व याकःचा जूबलय् ला झन वया छेँजःपिन्सं वयात लुटेयात, जोते याकल । वयागु हि त्वनाः नं मगानाः क्वँय् तक्कं चुचुप्याःवल । उकिं वयागु अवस्था झनझन बांमलाना वन । आः वयात सुनानं मान सम्मान व इज्जत मयानाहल । सकसितं न्याय बियाच्वंम्ह न्यायाधीस न्हिंन्हिं थः अन्यायया गालय् दुनावना च्वन । थज्याःगु असह्य वेदनां ग्रस्त जुयाः वं थःगु मानसिक अवस्था हे गुमे यात । थः कलाः, मस्त, सम्पत्ति जक मखु, थःगु होश तकं मदयेका च्वन ।

न्यायधीसया अज्याःगु अवस्था जुइवं छेँय् जःपिनिसं वयात -खिचा सी वाये यंकेथें) मानसिक अस्पतालय् जुक्क वाये यंकल । थौंकन्हय् व मानसिक अस्पतालय् दुने च्वनाः नं अस्पताल हे थ्वयेक न्हिलाच्वन - हा ...... हा ...... हा ...... हा ......

साभार : बाखं दबू ल्याः ४।

More Stories Like this