एमआरपी नं गम्भीर गल्ती
येँ (सन्ध्या टाइम्स)/छु झिंस्वदँ दुम्ह मचायात नेपाःया नागरिकता बी ला? झिंस्वदँ दुम्ह मचाया थःगु हे पासपोर्ट दइ ला?
थ्व मदयेमाःगु खः। तर नेपाःया परराष्ट्र मन्त्रालयं नकतिनि जारी याःगु एमआरपी पोसपोर्टय् १३ दँ जक दुम्ह मनूया नां उल्लेख जुयाच्वंगु दु ।
स्यांज्याया दिपक थापाया नामय् जारी जूगु एमआरपी पासपोर्टय् वय्कःया जन्ममिति गल्ती छापे यानाः वय्कःयागु उमेर १३ दँ याना बिउगु खः ।
थःगु पासपोर्टय् गल्ती जुयाच्वंगु खँ थापां अबलय् तिनि सिल गबलय् कि वय्कलं कोरियाय् रोजगारीया लागिं वनेगु भाषा शिक्षणया फाराम भरे यायेगु तयारी यानादिल। थाकुक लाइन च्वनाः फाराम कया हयेधुंकाः उकी थःगु विवरण च्वये त्ययेकाः वय्कलं पासपोर्टय् जन्ममिति गल्ती छापे जुयाच्वंगु खंकादिल। थुकिं यानाः वय्कःया थुपालय् कोरिया वनेगु तयारी प्रभावित जुइगु जूगु दु ।
छुं जुयाः वय्कः थज्याःगु पासपोर्ट ज्वनाः विदेश वने हे लाःगु हे जूसां वय्कःयात या त एअरपोर्टं हे पितिना हइगु, या त नकली पासपोर्ट ज्वना वल धकाः अन हे ज्वनाः कुना बीगु तकं सम्भावना दुगु खँ धाःगु दु ।
नेपालय् एमआरपी पासपोर्ट लागू यायेगु लागिं गुलि तःधंगु हंगामा जुल धइगु खँ सकस्यां सिउ। अज्याःगु पासपोर्ट तकं थथे लापरवाहीपूर्वक गल्ती छापे याना हःगुलिं थुकियात परराष्ट्र मन्त्रालयया गम्भीर त्रुटि खः धाःगु दु। थुकी व्यक्तिया फुक्कं विवरण डिजिटल रुपं मुंका तइगु जूगुलिं थुकियात व्यक्तिया दकलय् आधिकारिक दस्तावेज कथं माने याइ। थज्याःगु दस्तावेजय् हे अथे गल्ती वःगुलिं आक्रोशित जूम्ह वय्कलं आः थुकियात कयाः उजुरी तयेगु तयारी यानाच्वंगु खँ सीदुगु दु। कोरिया वनेगु रोक जुल धाःसा क्षतिपूर्ति समेत बीमाः धाःगु दु ।
