हया खँय् माओवादी व एमाले दुने विवाद

प्रधानमन्त्री झलनाथ खनालं मन्त्रिपरिषद् विस्तार यानाः उकियात पूर्णता बियादीवं हे सरकारय् दुथ्याःगु तःधंगु दलतय् दुने कचवं नं शुरु जूगु दु। खास यानाः गृह मन्त्रालय माओवादीयात बिल धकाः एमाले दुने विवाद पिहां वःगु दुसा माओवादी दुने नं थःत वःगु गृह मन्त्रालय थःत मबिसे मेम्हेसित बिल धकाः मेगु विवाद ब्वलंगु दु। गृहयात कयाः एमाले दुने ब्वलंगु विवाद मुक्कं सैद्धान्तिक खःसा वहे गृहयात कयाः माओवादी दुने ब्वलंगु विवाद धाःसा व्यक्तिगत व बेतुकी खः। वास्तवय् माओवादीयात गृह मन्त्रालय हे छाय माःगु धइगु खँयात कयाः पार्टीया सचिव सीपी गजुरेलं थः कार्यकर्तातय्त बियादीगु न्वचुया छगू टेप सार्वजनिक जूगु दु। उगु टेपय् वय्कलं स्पष्ट रुपं हे आः थःपिं जनविद्रोहया तयारीपाखे वनाच्वनागु दु, उकिं उगु जनविद्रोहयात सफल यायेगु लागिं थःपिंत गृह हे माःगु खः धयादीगु दु। यदि जनविद्रोहया लागिं हे माओवादीं गृह मन्त्रालय हजि धकाः फ्वनाच्वंगु खःसा माओवादी शान्ति प्रक्रियाय् पूर्ण रुपं मवःतले उमित गृह मन्त्रालय बी जी मखु धकाः एमालें ल्ह्वनाच्वंगु तर्क जायज जुइ। सम्भवतः एमाले नेतातय्सं थज्याःगु खँ सीकाः हे गृहय् पंगः थनाच्वंगु जुइफु ।

तर आः माओवादीया थ्व अवस्थाय् नं हिउपाः वयेधुंकूगु दु। गजुरेलं गुगु इलय् थ्व खँ धयादिल, अबलय् माओवादी विद्रोहया लाइन ज्वनाः न्ह्यानाच्वंगु खः। आः माओवादीं विद्रोहयात त्वःताः शान्ति व संविधानया लाइन ज्वनेधुंकल। उकिं थ्व इलय् माओवादीयात गृह बीत ग्याना च्वनेमाःगु अवस्था मंत। तर गृह थःत हे माः धकाः माओवादी दुने ब्वलंगु विवादं धाःसा बांलाःगु सन्देश बिउगु खने मंत ।

More Stories Like this