गृहया कारणं पार्टी-पार्टीइ 'गृहयुद्ध'

येँ (सन्ध्या टाइम्स)/ताःई न्ह्यवंनिसें विवादया विषय जुयाच्वंगु गृह मन्त्रालय म्हिगः अन्ततः माओवादी नेता कृष्णबहादुर महरायात बिउगु दुसा उकिया नापनापं गृहया हे खँयात कयाः माओवादी व एमाले दुने थःथःपिनि गृहयुद्ध नं चर्के जूगु दु। थुकिं यानाः सरकार झन् अस्थिर जूवंगु टिप्पणी थन याना हःगु दु ।

गृह मन्त्रालय थःपिंत माः धकाः माओवादीं एमालेलिसे दावी यानाच्वंगु ला जु हे जुल, उकिया नापनापं यदि गृह थःपिंत बीगु जुल धाःसा गृहमन्त्री जुइम्ह सु धइगु खँय् नं माओवादी दुने कचवं जुयाच्वंगु खः। गृहया लागिं पार्टी दुने प्रचण्ड पक्षधर शान्तिमन्त्री वर्षमान पुन (अनन्त) व मोहन वैद्य पक्षधर नेता देव गुरुङ्ग दथुइ धेंधेंबल्लाः जुयाच्वंगु खः। तर थौं मन्त्री दयेकूबलय् निम्हेसितं मयासे सञ्चारमन्त्री जुयाच्वंम्ह कृष्णबहादुर महरायात गृहमन्त्री दयेकेवं अध्यक्ष प्रचण्ड खनाः गुरुङ्ग व अनन्त निम्हं तंचाःगु दु। महरायात गृहमन्त्री दयेकेवं अनन्तं शान्तिमन्त्री पदं तुरुन्त हे राजीनामा बिउगु दुसा वैद्य पक्षं मन्त्री दयेकूपिं निम्ह मन्त्रीत जयपुरी घर्ती व महेन्द्र यादवं शपथ बहिष्कार याःगु दु। जयपुरीं ३३ प्रतिशत मिसातय्त मन्त्री मयाःतले मन्त्री मजुइगु खँ धाःगु दु। अनन्तयात धाःसा प्रचण्डं जेठ १४ लिपा थःहे प्रधानमन्त्री जुइगु सम्भावना दु, अबलय् उपप्रम सहित गृह बी धकाः ह्ययेकूगु खँ सीदुगु दु ।

गृहया खँय् भारत नं जिल्ल
विवादास्पद गृह मन्त्रालय आकाझाकां कृष्णबहादुर महरायात बिउगु खनाः जःलाखःला देय् भारत जिल्ल जूगु दु। उकिसनं सञ्चारमन्त्री जुयाच्वंम्ह कृष्णबहादुर महरा गृहमन्त्री जू वःगुलिं ला भारत 'चकित' हे जूगु खँ टाइम्स अफ इण्डियाया अनलाइन संस्करणय् धयातःगु दु ।

छुं ई न्ह्यः तिनि सभासद् न्यायेगु लागिं महरां चीनलिसे ध्यबा फ्वंगु सम्बन्धी टेप सार्वजनिक जूगु प्रशंग न्ह्ब्वसें अनलाइनय् अज्याःम्ह मनूयात गृहमन्त्री दयेकूगुलिं भारत चकित जूगु खः धयातःगु दु। लुमंके बहः जू, उगु टेप भारतं हे सार्वजनिक याना बिउगु खः ।

अथे हे नेपालय् भारतीय राजदूत नापं भारतीय कम्पनीतय्त प्रहरीं सुरक्षा बी मफुत धकाः उकुन्हु तिनि भारतीय विदेशमन्त्री एसएम कृष्णां आलोचना याना थकूगु खःसा उकियात नं वेवास्ता यानाः गुपिंपाखें भारतीय राजदूतयात खतरा दुगु खः उमित हे गृहमन्त्री दयेकल धकाः नं समाचारय् उल्लेख यानातःगु दु। कृष्णा नेपाः वःबलय् थ्व बारे प्रचण्ड लिसे कडा रुपं वार्ता जूगु खः ।

थौं झलनाथया लाखः पीगु
गृह मन्त्रालय माओवादीयात बिउगु खँय् थौं च्वनीगु एमालेया पोलिटब्युरो बैठकय् प्रधानमन्त्री लिसें पार्टी अध्यक्ष झलनाथ खनालया 'लाखः पीगु' जूगु दु। थौं विहीवाः पोलिटब्युरो बैठक च्वनेगु धकाः थम्हं हे सःताः वयां छन्हु न्ह्यः हे माओवादीयात गृह मन्त्रालय लःल्हायेगु ज्या वय्कलं छाय् यानादिल खः, सुनां नं मसिउ। थौंया बैठकय् अथें नं वय्कःया राजीनामा माग जुइगु खँ वयाच्वंगु खः। प्रम खनालं म्हीग तिनि नेता माधव नेपालयात नापलानादीबलय् माधवं वय्कःयात गृह छुं हे हालतय् माओवादीयात बीमते धयाहःगु खः। तर खनालं सुयागुं हे खँ मन्यसे माओवादीयात गृह लःल्हाःगु कारणं थौंया पोलिटब्युरो बैठकय् वय्कःया तःधंगु हे आलोचना जुइगु सम्भावना दु। थुकिं यानाः थौं या त बैठक हे 'पोष्टपोण्ड' जुइफु, या त वय्कः बैठकय् हे मवनेफु धाःगु दु। पार्टीया सचिव प्रदिप ज्ञवालीं नं प्रधानमन्त्रीपाखें गृह माओवादी मबीगु धइगु पार्टी निर्णयया उल्लंघन याःगुलिं थ्व थौंया बैठकया मुद्दा जुइ धयादीगु दु ।

'जनविद्रोह यायेत गृह मन्त्रालय'
आखिर माओवादीतय्सं रक्षा मन्त्रालय त्वःताः जूसां नं गृह मन्त्रालय हे छाय् माग यानाच्वन थें धकाः न्ह्यसः पिहां वयाच्वंगु इलय् लाक्क माओवादीया सचिव सीपी गजुरेलं गृह थःपिंत छाय् माःगु धकाः न्ववानादीगु छगू टेप सार्वजनिक जूगु दु। वंगु फागुण १५ गते धरानय् जूगु छगू प्रशिक्षण कार्यक्रमय् वय्कलं न्ववानादीगु उगु टेप म्हिगः बीबीसीं सार्वजनिक याःगु खः। टेपय् वय्कलं आः थःपिंसं याकनं हे जनविद्रोह यायेत्यनागु दु, उगु इलय् मुठभेद जुइगु सेनालिसे मखु, प्रहरीलिसे खः, उकिं प्रहरीयात न्ह्यःने मछ्वयेगु लागिं गृह थःपिंत माःगु खः धकाः स्पष्ट रुपं धयादीगु दु। वय्कलं थःपिं सरकारय् वनेगु नं जनविद्रोह तयारीया लागिं खः धकाः नं धयादीगु दु। टेप बारे न्यनेकने याःबलय् सचिव गजुरेलं जनविद्रोह धइगु सशक्त जनआन्दोलन धयागु खः, मेगु छुं तःधंगु खँ मखु धकाः स्पष्ट यानादिल ।