पत्रकारिताय् हावी जुया वःगु राजनीति

नेपाल पत्रकार महासंघया २३ क्वःगु महाधिवेशन नकतिनि क्वचाल। महासंघया न्हूगु नेतृत्व ल्ययेगु इलय् जुइगु चुनावय् न्ह्याबलें नं राजनीति दल हावी जुया वयाच्वंगु खःसा थुगुसी थ्व विषययात थीथी पत्रकारतय्सं चर्चाया विषय नं दयेकल। चुनाव पत्रकार महासंघया खःसां अन कांग्रेस, एमाले व माओवादी समर्थित पत्रकारत हावी जुयाच्वंगु दइ। न्हापा न्हापा राजनीतिया थ्व रंग प्रगतिशील पुचः व प्रजातान्त्रिक पुचः धइगु आवरणय् वइगु खःसा आः अज्याःगु सालुगु आवरण नं त्वःताः तप्यंक हे पार्टीया नां कयाः वयेगु शुरु जूगु दु। आः जुयाच्वंगु महासंघय् नं थ्व प्रत्यक्ष अनुभूत जुल ।

थ्व खः कि पत्रकारिता स्वतन्त्र व निष्पक्ष जुइमाः धाःसां नं थ्व पाय्छि उकथं हे निष्पक्ष व स्वतन्त्र जुइ मखु। पत्रकारिता बिचार पक्षलिसे स्वाःगु विषय जूगु कारणं उकी ज्या याइपिं मनूत छुं कि छुं राजनीतिक बिचाःनाप नं आवद्ध जुयाच्वंगु दइ। तर अथे धकाः थःगु पेशायात मुक्कं राजनीतिक पार्टीतय् न्ह्यवःसा दयेका जुइगु धाःसा पाय्छि मखु। राजनीतिक पार्टीया न्ह्यवःसा जुइगु पत्रकारिता न गबलें स्वतन्त्र जुइ फइ, न निष्पक्ष हे। पत्रकारितायात थुकिं मुक्त यायेगु दायित्व पत्रकारतय्गु हे खः। अझ पत्रकार महासंघया ला झन हे खः। लिसें थज्याःगु खँय् राजनीतिक दलतय्सं नं बिचाः यायेमाः। यदि राज्यया प्यंगूगु अंगया सम्मान बियातःगु पत्रकारिता स्वतन्त्र जुइ मफुत धाःसा देशय् वःगु लोकतन्त्र नं धिसि लाइ मखु। थ्व खँय् राजनीतिक दलत स्पष्ट जुइमाः। पत्रकारिताया थ्व राजनीतिकरण राजनीति व पत्रकारिता निगुलिंया लागिं पाय्छि मखु ।

More Stories Like this