आइपिएल ४ : कोलकातां हैदरावादयात बुकल

इण्डियन पि्रमियर लिग आइपीएल ४ अन्तर्गत वंगु बहनी जूगु कासाय् कोलकाता नाइट राइडर्जं डेक्कन चार्जर्स हैदरावादयात २० रनं बुकूगु दु । युसुफ पठानया अविजित ४७ व मनोज तिवारीया ३३ रनलिसे ८० रनया साझेदारीया ग्वाहालिं हैदरावादयात कोलकातां बुकूगु खः । उगु धेंधेंबल्लाः कासाय् टस बुकाः न्हापां ब्याटिङ्ग याःगु कोलकातां निर्धारित २० ओभर म्हिताः ४ विकेट तंकाः १ सय ६९ रन काःगु खः । कोलकाताया कप्तान गौतम गम्भीरं २२ बलय् ३४ रन दयेकूगु खः । जवाफी ब्याटिङ्गय् कुहांवःगु हैदरावादं २० ओभरया समाप्तिइ ६ विकेट तंकाः १ सय ४९ रन जक कायेत ताःलाःगु खः । हैदरावादया एस धावनं दकले अप्वः ५४ रन दयेकूगु खः ।

धेंधेंबल्लाः कासा अन्तर्गत म्हिगः हे चेन्नई व राजस्थान लिसे पुने व मुम्बईदथुइ कासा जूगु दु । थ्वहे दथुइ भारतीय क्रिकेट टिमया पूर्वकप्तान सौरभ गांगुलीं आइपीएलय् म्हितूगु खः । आइपीएल ४ या लिलामीइ शामेल गांगुली छु नं टिमय् मदु । पुने वारियर्सं घाःपाखें पीडित आशीष नेरहाया थासय् गांगुलीयात थःगु टिमय् तयेगु निर्णय न्यंकूगु खः । आइपीएलं नं गांगुलीयात टिमय् दुथ्याकेत उजं ब्यूगु भारतीय सञ्चार माध्यमतय्सं जानकारी ब्यूगु खः । गांगुली थ्व स्वयाः न्ह्यः कोलकातापाखें म्हिताः वयाच्वंगु खःसा आःतक्क म्हितूगु च्यागू मध्ये मुक्कं निगू कासा त्याकूगु युवराज सिंहया कप्तानीइ दुगु पुने प्यंगू अंकलिसे अंक तालिकाय् दकले ल्यूने लानाच्वंगु दु ।

More Stories Like this