नेपाः देय् म्हसीकेत पोर्चुगलय् 'दर्शन नेपाल’ सुपरमार्केट
लिस्बोनया मू लँपुइ छगू तःपाःगु बोर्डय् 'दर्शन नेपाल' च्वयातःगु सुपरमार्केट खनेदु । नेपाली खँग्वः अले नेपाः हे स्वानाच्वनेवं न्ह्याम्ह हे जूसां नं नेपाःमिपिं दुने दुहांवनेवं हे थःगु हे छेँय् थें ताइ । नेपाःयात पोर्चुगलया व्यस्त शहरय् नापं परिचित याइगु दर्शन नेपाल नांया उगु सुपरमार्केटय् नीम्ह नेपाःमिपिंत रोजगारी बियातःगु दु । हथाय् चाचां अले ज्याया व्यस्तताया अवस्थाय् नं ग्राहकया न्ह्यःने नेपाली सत्कार कथं सम्बोधन यायेगु नितिं लिच्यूगु मदु उपिं नेपाःमिपिं । गुलिं ला थ्यनेगु व सफा यायेगु ज्याय् व्यस्त जुयाच्वंगु दुसा गुलि गुलिं सरसामान मिलय् यायेगु, ग्राहकतय्त माःगु ज्वलंत लिकायेगु नितिं ग्वाहालि यायेगु निसें कयाः थ्यंकाः बिइगु व हिसाब किताबय् नं उलि हे व्यस्त जुयाच्वंगु खंकेफु । 'छुं सामान माल धाःसा जिपिं न्ह्यःने दुनि' छाय्पियातःगु वसतय् ला सफा यायेगु ज्याय् व्यस्त जुयाच्वंम्ह घनश्याम सुवेदीं धयादी - 'आः जिपिं नेपाःमिपिंसं नं छुं नं छुं यायेमाःगु जुल सर, गुलितक्क न्ह्याबलें इण्डियन व चाइनिजतय्गु भरय् च्वनेगु ।
आपालं धइथे न्हियान्हिथंया उपभोग्य सरसामानत न्यायेगु नितिं मेमेगु देय्या व्यवसायीतय्गु भरय् च्वनाच्वंगु अवस्थाय् थ्व सुपरमार्केटं नेपाःमिपिनिगु दथुइ बांलाःगु प्रभाव लाकूगु दु । सुथसिया च्याताः इलंनिसें बहनीसिया झिंनिताः ईतक्क सेवा बियाः वयाच्वंगु थ्व सुपरमार्केटं फाइदा जक मजुसे नेपाःमिपिनिगु नितिं सेवा व सुविधा बिइगु खँय् नं ध्यान बियाः वयाच्वंगु सञ्चालक सूर्य हमालया धापू दु । 'नेपाःमिपिनिगु नितिं मेमेगु सुपरमार्केट स्वयाः नं जिमिसं दंक सामानत उपलब्ध यानाः च्वनागु दु' हमालं धयादिल । चिलीइ उत्पादन जूगु तरकारी थनं मीमालाच्वंगु अवस्थाय् नेपाःमिपिंसं हे उत्पादन याःगु तरकारी, फलफूलत लिसे नेपाली स्वादया कःकःचा, लैं, मुस्याः थेंज्याःगु तरकारीत उत्पादन यानाः नेपाःमिपिनिगु म्हसीका ब्यागलं कथं बीफयेमाः धइगु जिमिगु मू उद्देश्य खः ।' नेपाःमिपिनिगु नितिं सहुलियत बियाः वयाच्वंगु उगु मार्केटय् नेपाःमि ग्राहकपिनिगु नितिं उलि हे हूल मुनेगु याः वय्कलं न्ह्यःथनादिल ।
मार्केटय् सामान न्यायेगु नितिं थ्यंम्ह हरी सापकोटां धयादी - 'जिमिसं नेपाःमिपिनिगु नितिं मेथाय् स्वयाः नं थं भचा धेबा दंक बियाः वयाच्वनागु दु । इण्डियन व चाइनिज थाय् वनेगु स्वयाः थःहे नेपाःमि दाजुकिजाया थाय् वयेगु बांलाः ।' रेष्टुरेण्ट व्यवसायपाखें नेपाःमिपिनिगु म्हसीका बियाः वयाच्वंगु अवस्थाय् नेपालय् उत्पादन जूगु दुरुख्वः, गुन्द्रुक, अय्लाः, नेपाली कफी, नेपाली च्या, मसला, छ्वं, चाउचाउ लगायतया उपभोग्य सामानत दुथ्याकेगु मू उद्देश्यं व नेपाःयात म्हसीकेगु उद्देश्य दुगु सुपरमार्केट सञ्चालकया धापू दु ।
नेपाः व पोर्चुगल दथुइया स्वापूयात अझ धिसिलाकेगु नितिं नेपाःमिपिसं न्ह्याकूगु व्यवसायया विशेष महत्व दयेगु याः । न्हापा नेपाली नसापाखें म्हसीका वयाच्वंपिं नेपाःमिपिसं लिपांगु इलय् वयाः किराना सरसामान, साइबर, सफू पत्रपत्रिका, मोबाइल पसःनिसें कयाः नेपाली हस्तकलापाखें दयेकातःगु सामान लगायत थीथी कथंया व्यवसाय सञ्चालनय् वयाच्वंगु दु ।
More Stories Like this
दक्षिणी अफगानिस्तानय् नीम्ह तालिवानपाखें आत्मसमर्पण भारतया उडिसाय् चलखं झिंखुम्ह सित अमेरिका व बेलायतया गुप्तचर एजेन्सीया गद्दाफीलिसे साँठगाँठ रुसं सिरीयाया चिकं मन्यायेगु विषययात कयाः कुंखिन जापानय् न्ह्यगू दशमलव छगू रेक्टरया भुखाय्
