येँया बालाजुइ ल्यासेम्ह मिसाया शव लुल
म्हं छखे, छ्यं छखे
येँ (झीगु स्वनिगः)
येँया तसकं व्यस्त जुयाच्वनीगु थाय् बालाजुइ म्हिगः सुथय् थ्यंमथ्यं नीन्यादँ तिनि दुम्ह छम्ह ल्यासेम्ह मिसाया सीम्ह विभत्स अवस्थाय् लुयावःगु प्रहरीं जानकारी ब्यूगु दु । येँया बालाजु बाइसधारा उद्यान लिक्कया उगु जंगलय् उम्ह नीन्यादँ दुम्ह मिसाया नां मेनका खत्री जूगु प्रहरीं जानकारी ब्यूसें उगु सीम्ह तसकं हे ग्यानापूगु विभत्स अवस्थाय् लुयावःगु खः । छ्यं छखे व म्ह छखे लाकाः वां छ्वयाः तःगु अवस्थाय् लूगु खः । उम्ह मिसाया स्थायी थाय्बाय् गोरखाया थुमी गाविस - ७ सं च्वम्ह मिसा जूगु नापं प्रहरी अनुसन्धानपाखें प्रष्ट याःगु खः । महानगरीय प्रहरी प्रभाग बालाजुया प्रमुख प्रहरी नायब उपरीक्षक दिवेश लोहनीं ब्यूगु जानकारी कथं छ्यं छखे व म्ह छखे यानाः वांछ्वयाः तःगुलिं उगु घटना अझ रहश्यमय जूगु जानकारी ब्यूगु दु ।
थ्वहे दथुइ उगु हत्याय् ल्हाः दुगु द्वपनय् मेनकाया भाःत नेपाली सेनाय् ज्या यानाः वयाच्वंम्ह भरत खत्रीयात प्रहरीं नियन्त्रणय् कयाः न्यनेकने यानाच्वंगु दु । न्यनेकने यायेगु झ्वलय् सीम्ह मेनका खत्री भरतया तःधिम्ह जहान जूगु खँ प्रष्ट जूगु खःसा घटनायाबारे अनुसन्धान जुयाच्वंगु दु । महानगरीय प्रहरी प्रभाग बालाजुया प्रमुख प्रहरी नायब उपरीक्षक दिवेश लोहनीं छगू सञ्चार माध्यमलिसे खँल्हाबल्हा यानादिसें थौंकन्हय् थज्याःगु घटना न्हापा स्वयाः म्हो जूगु जानकारी ब्यूसें वय्कलं थज्याःगु घटनायात कयाः दोषीयात कडा कारबाही यायेगु बचं नापं ब्यूगु खः । गुलिफु उलि याकनं अपराधीयात मालेगु ज्या जुयाच्वंगु दुसा उकिया नितिं थीथी मनूत नापं न्यनेकने यायेगु ज्या न्ह्याकेधुनागु वय्कलं जानकारी बियादीगु दु ।
