शुक्रवाःनिसें इन्धन आयात सहज जुइगु

येँ (झीगु स्वनिगः)

बजारय् करिब निवाः न्ह्यःनिसें खनेदुगु पेट्रोलियम पदार्थया अभाव शुक्रवाःनिसें सामान्य जुइगु जूगु दु । नेपाल आयल निगमं म्हिगःनिसें रक्सौलपाखें पेट्रोलियम पदार्थया आयात वृद्धि याःगुलिं शुक्रवाःनिसें वितरण यायेगु ज्या सामान्य जुइगु जानकारी ब्यूगु खः । निगमया प्रवक्ता मुकुन्दप्रसाद ढुंङ्गेलं पेट्रोल, डिजेल, मचिकं लगायतया इन्धन नीप्यद्वः किलोलिटर म्हिगः रक्सौलपाखें आयात यायेत्यनागुलिं शुक्रवाःनिसें स्वनिगलय् पेट्रोलियम पदार्थया आपूर्ति बजारय् माग कथं जुइगु जूगुलिं स्थिति सामान्य जुयाः वनीगु जानकारी बियादिल ।

नेपाल आयल निगमं भारतीय आयल निगमयात पुलांगु बक्यौदा करिब निगू अर्ब तका बिइ ल्यं दनेवं पेट्रोलियम पदार्थया आपूर्तिइ करिब पीगू प्रतिशत कटौति यायेवं देशय् पेट्रोलियम पदार्थया अभाव जुयावःगु खः । लिपांगु इलय् सरकारं छगू अर्ब न्यय्गू करोड तका नेपाल आयल निगमदथुइ समझदारी कायम यानाः पेट्रोलियम पदार्थया आयातय् वृद्धि यायेत्यंगु खः । स्वनिगलय् न्हियान्हिथं निगू लख लिटर पेट्रोल, स्वंगू लख लिटर डिजेल खपत जुइगु यानाच्वंगु दु ।

More Stories Like this