सरकारयात दुई तिहाई बहुमत
येँ (झीगु स्वनिगः)
वर्तमान सरकारयात मधेसी जनअधिकार फोरमाया नं समर्थन दयेवं आः दुई तिहाई बहुमतया सरकार जुयाब्यूगु दु । एकीकृत माओवादी व एमाले नापं चिचीधंगु वाम दलतय्सं जक समर्थन यानाः बहुमतया सरकार जुयाच्वंगु खःसा आवंलि दुई तिहाई बहुमतया सरकार जुयाब्यूगु खः । संविधानसभाया दक्ले तःधंगु दल एकीकृत माओवादी, स्वंगूगु थासय् लाःगु एमाले नापं मधेसवादी दलत मध्ये तःधंगु कथं न्ह्यःने वयाच्वंगु मधेसी जनअधिकार फोरमं नं समर्थन यायेवं अथे दुई तिहाई बहुमतया सरकार जूगु खः ।
संघीय गणतान्त्रिक नेपाःया न्हुगु संविधान दयेकेगु नितिं छुं नं धारा पारित यायेगु नितिं दुई तिहाई बहुमत माःगु संवैधानिक प्रावधान दु । आः झलनाथ खनालया नेतृत्वय् दुगु वर्तमान सरकारया दुई तिहाई बहुमतया समर्थन दुगुलिं न्हूगु संविधान निर्माणया इलय्हे ज्या यायेत अःपुइ धकाः मनूतय्सं अनुमान यानाहःगु दु ।
