माओवादीया न्हूपिं मन्त्रीतपाखें सपथग्रहण

येँ (झीगु स्वनिगः)

संविधानसभाया दक्ले तःधंगु दल एकीकृत नेकपा -माओवादी) नापं व्यवस्थापिका संसदया फुक्क धैथें चिचीधंगु तकं वाम नापं प्रगतिशिल पार्टीतय्गु समर्थनय् गठन जूगु वर्तमान सरकारय् वनीपिं एकीकृत माओवादीं आः न्हूपिं मन्त्रीत दुथ्याकूगु दु । वर्तमान सरकारय् उप प्रधान नापं संचार मन्त्री जुयाच्वनादीम्ह माओवादीया नेता कृष्णबहादुर महरायात उप प्रधान नापं गृहमन्त्रालयया जिम्मेवारी ब्यूगु दु । वय्कः म्हिगः बुधवाः तक वर्तमान सरकारया हे उप प्रधान नापं संचारमन्त्री जुयाः ज्या यानाच्वनादीम्ह खः । न्हापा नं माओवादीया नायः प्रचण्डया नेतृत्वय् दयेकूगु सरकारया इलय् नं वय्कः मन्त्री जुयाः ज्या यानादी धुंकूम्ह खः । सुचना तथा संचार मन्त्रालया भाला अग्नीप्रसाद सापकोटा जुयादीगु दु । अथे हे स्वास्थ्य मन्त्रीइ शक्ति बस्नेतयात, युवामन्त्रीइ हितबहादुर तामाङ, शान्ति मन्त्रीइ विश्वनाथ शाह, महिला मन्त्रीइ जयपुरी घर्ती, भूमिसुधारमन्त्रीया रामचन्द्र चौधरी व उद्योगमन्त्रीया भाला महेन्द्र पासवान व कानुन मन्त्रीइ प्रभू शाह जुयादीगु दु । एकीकृत नेकपा -माओवादी)पाखें म्हिगः बुधवाः हे माओवादीपाखें मन्त्री जुयादीपिं इमिगु नां वर्तमान प्रधानमन्त्री झलनाथ खनालयात लःल्हाःगु दु ।

पार्टीया सिफारिस कथं धर्मशिला चापागाई, हकिकुल्लाह खाँन, देवी खडका व धु्रवकुमार लिम्बुयात राज्यमन्त्रीया रुपय् यंकूगु दु । संचारमन्त्री सापकोटा व शान्तिमन्त्री शाह पार्टीया पोलितब्यूरो दुजः खः । अथे हे स्वास्थ्य मन्त्री बस्नेत नं पोलितब्यूरो दुजः खःसा युवामन्त्री तामाङ, महिला मन्त्री घर्ती, भूमिसुधार मन्त्री चौधरी व उद्योगमन्त्री पासवान केन्द्रीय दुजःपिं खः । म्हिगः बुधवाः बहनी हे राष्ट्रपति निवास सितलनिवासय् राष्ट्रपति डा. रामवरण यादवया न्ह्यःने प्रधानमन्त्री झलनाथ खनालं एकीकृत माओवादी व मधेसी जनअधिकार फोरम नेपालया सिफारिसय् न्हू नियुक्ति जुयादीपिं मन्त्रीतय्त सपथग्रहण याकादीगु खः ।