म्याद थपया प्रस्ताव भद्रगोल
चीधंगु संविधान जारी यायेत कांग्रेस तयार मदु
येँ (सन्ध्या टाइम्स)/पूर्ण संविधान हये मफुसा आः तक सहमति जुइधुंकूगु फुक्कं बुँदा दुथ्याकाः अपूर्ण संविधान जकसां जारी यायेगु व वयां लिपा संविधानसभाया म्याद थपे यानाः ल्यं दुगु ज्या यायेगु धकाः माओवादीं हयाच्वंगु प्रस्तावयात प्रमुख प्रतिपक्षी नेपाली कांग्रेसं अस्वीकार यायेवं आः संविधानसभाया म्याद थपे जुइगु ज्या तकं अनिश्चित जूगु दु ।
म्हिगः च्वंगु कांग्रेसया केन्द्रीय कार्यसमितिया बैठकं विवादय् लानाच्वंगु सम्पूर्ण बुँदाया बारे सहमति कायम मजुइकं अज्याःगु संविधान जारी यानाया छुं हे अर्थ दइ मखु धासें उकथंया संविधान पित बीगु प्रस्तावयात अस्वीकार याःगु खः ।
एमालेया संस्थापन पक्ष व माओवादी दथुइ जेठ १४ गते पूमवंगु संविधान जारी यायेगु व वयां लिपा संविधानसभाया म्याद खुला थपे याकेगु धकाः ग्वसाः जुयाच्वंगु खःसां कांग्रेसं म्हिगः याःगु निर्णयया कारणं अज्याःगु संविधान जारी मजुइगु जक मखु संविधानसभाया म्याद तकं थपे यायेगु खः लाकि मखु धइगु न्ह्यसः पिहां वःगु खँ सूत्रतय्सं धाःगु दु। विवादास्पद विषयतय् बारे आः हे छलफल यानाः जेठ १४ गते न्ह्यः निर्णय याये फइगु सम्भावना मदुगु खँ नं सूत्रं धाःगु दु ।
संविधान जारी यायेगु वा संविधानसभाया म्याद थपे यायेगु धइगु विवादया दथुइ पुलांम्ह प्रधानमन्त्री लिसें एमाले नेता माधव नेपालं धाःसा आःयात विवादास्पद विषयत अनुसूचीइ तयाः संक्षिप्त संविधान जारी यायेगु व संविधानसभा भंग याना छ्वयेगु, वयां लिपा न्हूगु चुनाव यानाः सदनं हे विवादास्पद विषयत निर्क्यौल यायेगु धइगु प्रस्ताव हयाच्वंगु खँ सीदुगु दु। माधव नेपालं थः प्रधानमन्त्री जुयाच्वंगु इलय् हे उगु प्रस्ताव न्ह्यथनाच्वंगु खःसा आः प्रधानमन्त्री झलनाथ खनालं नं उगु प्रस्तावयात सकारात्मक रुपं कयाच्वंगु खँ नं विज्ञ सूत्रं धाःगु दु ।
उखे जुजुवादी राप्रपा नेपाल व मधेसवादी दलतय्सं धाःसा थ्व संविधानसभां संविधान दयेके मफुगु कारणं संविधानसभा भंग यानाः हानं मेगु हे चुनाव यायेमाः धकाः माग यानाच्वंगु दु ।
थ्वहे झ्वलय् कांग्रेसं म्हिगः याःगु निर्णयं देशय् अराजकता ब्वलनीगु सम्भावना दुगुलिं कांग्रेसलिसे माओवादीं याकनं हे वार्ता याइगु जूगु दु ।
संविधान मवयाः युरोपयात चिन्ता
संविधान दयेकेगु ज्याय् नेपाःया राजनीतिक पार्टीतय्सं अझ नं अलमल खँ ल्हानाच्वंगु व जेठ १४ धाःसा न्ह्यःने वयाच्वंगु खँय् चिउताः प्वंकुसें युरोपियन युनियनया थीथी युरोपेली देतय्सं छगू मंकाः वक्तव्य जारी यासें हानं हिंसा ब्वमलंकेगु लागिं फुक्क पक्षं थःपिनि अडानयात चीधं यानाः न्ह्याः वनेत इनाप याःगु दु। जेठ १४ लिपा छु जुइगु थें धकाः थःपिं चिन्तित जुयाच्वनागु खँ नं वय्कःपिंसं धयादीगु दु ।
