संविधानसभाया म्याद थपे यायेगु विवाद
संविधानसभाया म्याद हानं थपे यायेगु लागिं पहल जुयाच्वंगु समाचार पिहां वयाच्वंगु दु। थुकिया लागिं खास यानाः एनेकपा (माओवादी) दकलय् सक्रिय रुपं ब्वाँय् जुयाच्वंगु दु। राजनीतिक पार्टीतय् सत्ताकेन्द्रित सोच थ्व पहलय् नं थुलि प्रवल जुयाः खने दयाच्वंगु दु कि सरकारय् दुथ्याःगु दलत संविधानसभाया म्याद थपे यायेमाः धइगु पक्षय् दुसा सरकारय् मदुगु दलत म्याद थपे याये मजिउ धइगु पक्षय् दु। थौं म्याद थपे याये मजिउ धयाच्वंपिं नेतातय्सं वास्तवय् दछि न्ह्यः संविधानसभाया म्याद दछि थपे याःगु खः। आः म्याद थपे यायेत ब्वाँय् जुयाच्वंगु पार्टी माओवादी अबलय् म्याद याये मजिउ धइगु पक्षय् दुगु खःसा माओवादीं स्वंगू बुँदे सम्झौता यानाः तिनि बल्लबल्ल म्याद थपे याके बिउगु खः। न संविधानसभाया म्याद थपे यायेमाः धाइपिंके थपे यायेमाःगुया छुं ठोस तर्क दु, न थपे यायेम्वाः धाइपिंके थपे यायेम्वाःगुया छुं ठोस तर्क दु। संविधानसभाया म्याद थपे यायेमाः वा म्वाः धइगु खँ संविधान निर्माणया ज्या गन थ्यनाच्वन धइगु खँय् सिबें नं थःपिं सरकारय् च्वंच्वनागु दु लाकि मदु धइगु खँय् आधारित जुयाच्वंगु दु। राजनीतिक पार्टीतय् थ्व सत्तालोलुप बिचाः नेपाः व नेपाली जनताया लागिं तःधंगु दुर्भाग्य खः। थौंकन्हय् नेपाली कांग्रेस, मधेसवादी दलत व एमालेया छगू गुट सत्ताय् मदु। उपिं थौंकन्हय् म्याद थपे याये मजिउ धइगु पक्षय् दु। अले माओवादी व सत्ताय् थ्यनाच्वंगु एमालेया मेगु गुट धाःसा म्याद थपे यायेमाः धइगु पक्षय् दु। दलतय्गु थज्याःगु मनोवृत्तिं वास्तवय् नेपाःया भविष्य अझ नं चकं मजूनि धइगुया हे संकेत बियाच्वंगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
