प्यम्ह सभासदया आन्दोलन
येँ (सन्ध्या टाइम्स)/न्हूगु संविधान च्वयेगु धकाः संविधानसभाय् दुहां वंपिं गुलिं सभासद्त ह्याउँगु पासपोर्ट मीगु काण्डय् लानाच्वंगु, गुलिं ल्वाभः ज्वना वःगु काण्डय् लानाच्वंगु व गुलिं घुस फ्वंगु काण्डय् लानाच्वंगु खँया चर्चा जुयाच्वंगु इलय् चीधंगु दलया प्यम्ह सभासद्तय्सं धाःसा वंगु छुं ई न्ह्यवंनिसें सदनय् लगातार नाराबाजी यानाः सदन हे अवरुद्ध याना वयाच्वंगु दु ।
म्हिगः नं वय्कःपिंसं सभामुख सुभास नेम्बाङं संसद शुरु जुल धायेसातकि हे नाराबाजी यानाः सदनया कारवाही अवरुद्ध याना बिल। सभामुखं सदन शुरु हे मजूनि धाःसां नं वय्कःपिंसं नाराबाजी यानाः सदनयात राष्ट्रपतिं छ्वयाहःगु पौ तकं ब्वंके मबीगु कुतः याःगु खःसां सभामुखं हल्लाया दथुइ हे राष्ट्रपतिं छ्वयाहःगु पौ ब्वनाः न्यंकादीगु खः। वयां लिपा सदन न्ह्याके फइगु अवस्था मदुगुलिं वय्कलं २५ गते न्हिनसिया ३ बजे तकया लागिं सदन स्थगित यानादिल ।
वंगु चिकुलाया अधिवेशनंनिसें हे थ्व प्यम्ह सभासद्तय्सं नाराबाजी यानाः संसद अवरुद्ध याना वयाच्वंगु दु । वय्कःपिनिगु खँ न्यनेगु निंतिं म्हिगः माओवादी, एमाले व कांग्रेसया वरिष्ठ नेतात च्वनाः वय्कःपिंलिसे वार्ता यायेगु धाःसां सकले थ्यंकः मवःगुलिं म्हिगः प्रम झलनाथ खनाल व माओवादी अध्यक्ष प्रचण्डं वय्कःपिंत सःताः अलग अलग वार्ता यानादीगु दु। उगु इलय् वय्कःपिंसं नेवाः प्रदेशया लागिं लागा मगाःगु, सार्वजनिक सेवाय् दलितयात कोटा प्रणालीं हे थाय् बीमाःगु, मुस्लिम समुदाययात नं संवोधन यायेमाःगु माग न्ह्यथंगु खः। सरकारं थ्व माग पूवंका बी धकाः आश्वासन जक बियां मगाः, छु छु पूवंके फइगु खः लिखित रुपं हे माः धइगु थःपिनि अडान नं पेश याःगु खः। यदि माग पूमवंकल धाःसा नाराबाजी जारी हे जुयाच्वनीगु ख्याच्वः नं बिउगु खः ।
वय्कःपिंत प्रम खनाल व अध्यक्ष खनालं मागयात संवोधन याये तर सदन अवरुद्ध याना बी मजिल धकाः इनाप याःगु खः। वय्कःपिंसं माग पूरा यायेगु खःसा लिखित प्रतिवद्धता हजि धकाः माग याःगु खः ।
