बिन लादेन धुंकाःया अल कायदा

थनिं च्यादँ न्ह्यः न्युयोर्कया ट्वीन टावरय् विमान न्याकाः विश्वय् हे तहल्का मचे यायेगु ज्याया नेतृत्व याःम्ह ओसामा बिन लादेनयात अन्ततः अमेरिकां स्यानां तुं त्वःतूगु दु। उगु आक्रमणया इलय् हे तत्कालिन अमेरिकी राष्ट्रपति जर्ज बुशं धाःगु खः 'अमेरिकायात बिन लादेन माःगु दु, म्वाःम्ह वा सीम्ह !' अबलय्निसें लादेनया लिउने ब्वाँय् जुयाच्वंम्ह अमेरिकां थौं वयाः बल्ल वयात समाप्त यायेत सफलता चूलाकूगु दु। लादेनया हत्यां विश्वन्यंकं च्वनाच्वंपिं अमेरिकी व अमेरिका समर्थक देय्तय् नागरिकयात लय्तायेकल जुइमाः ।

विश्वय् अमेरिका सु खनाः नं मग्याः, सिबाय् बिन लादेन छम्ह त्वःताः। लादेनया नेतृत्वय् सञ्चालन जुयाच्वंगु अल-कायदा नांगु संगठनं विश्वया फुक्क हे अमेरिका विरोधी संगठनतलिसे स्वापू बल्लाकाः अमेरिकायात आतंकित यानातःगु खः। अमेरिकायात ख्यायेफुम्ह छम्हयां छम्ह जक व्यक्तित्व जूगु कारणं लादेनयात आतंकवादी धाःसां नं विश्वया आपालं मुस्मां जनता व साम्राज्यवाद विरोधी शक्तितय्सं प्रत्यक्ष वा अप्रत्यक्ष रुपं समर्थन याना वयाच्वंगु खः। वास्तवय् वहे कारणं यानाः नं अमेरिकां अर्बौं डलर खर्च यानाः मालाच्वंगु खःसां लादेन बचे जुइत ताःलानाच्वंगु खः ।

आः लादेनया अन्त्य लिपा वयागु अल कायदा व थ्वं याना वयाच्वंगु अमेरिका विरोधी गतिविधि बन्द जुइ ला? थ्व थौंया मू न्ह्यसः जुयाच्वंगु दु। अल कायदा आः श्रीलंकाय् प्रभाकरणया मृत्यु जुइवं लिट्टे तना वं थें तना वनीगु खः वा इराकय् सद्दाम हुस्सेनयात स्याःसां वया समर्थकत उग्र जू थें अझ उग्र जुया वइगु खः, थ्व आः छुं ई लिपा सी दइ हे जुइ ।

More Stories Like this