विश्व व एशियन एथ्लेटिक्सया नितिं कासामि छनोट

येँ (झीगु स्वनिगः)

थ्वहे जुलाई ७ निसें १० तक्क जापानय् जुइगु एशियन एथ्लेटिक्स धेंधेंबल्लाः कासा व अगस्ट २७ निसें सेप्टेम्बर ४ तक्क कोरियाया देगु शहरय् जुइगु विश्व एथ्लेटिक्स धेंधेंबल्लाः कसााया नितिं नेपाल एमेच्युएर एथ्लेटिक्सं जेठ १० निसें १२ गतेतक्क राष्ट्रिय खुल्ला छनोट धेंधेंबल्लाः कासाया ग्वसाः ग्वःगु जानकारी ब्यूगु खः । धेंधेंबल्लाः कासा दशरथ रंगशालाया ट्याक एण्ड फिल्डय् जुइगु ग्वसाः खलकं जानकारी ब्यूगु खः । धेंधेंबल्लाः कासाय् मिजं इभेन्टपाखे १ सय , २ सय , ४ सय , ८ सय , १५ सय , ५ हजार व १० हजार मिटर ब्वाज्या दुसा १ सय १० मिटर हर्डल्स, हाइ जम्प, लङ् जम्प, त्रिपल जम्प, सट पुट, ज्याभलिन थ्रो, डिसकस थ्रो व ह्याम्बर थ्रो लगायत दुगु नं धाःगु दु । अथेहे मिसातय्गुपाखे १ सय , २ सय , ४ सय , ८ सय , १५ सय , ५ हजार व १० हजार मिटर ब्वाज्या दुसा १ सय मिटर हर्डल्स, हाइ जम्प, लङ् जम्प, त्रिपल जम्प, सट पुट, ज्याभलिन थ्रो व डिसकस थ्रो लगायत दु । ग्वसाः खलकं धेंधेंबल्लाः कासाय् ब्वति कायेमास्ते वःपिं कासामिपिंसं सम्बन्धित निकायलय् स्वापू तयेत नापं इनाप याःगु दु । उत्कृष्ठताया आधारय् धेंधेंबल्लाः कासाय् छ्वइगु नं ग्वसाः खलकं जानकारी बियादिल ।

More Stories Like this