कोरिया भाषा परीक्षाया आवेदन खुल्ला
येँ (झीगु स्वनिगः)
रोजगारीया नितिं दक्षिण कोरिया वनीपिनिगु नितिं कोरियाली भाषा परीक्षाया आवेदन खुल्ला जूगु दु । म्हिगःनिसें वैशाख २२ गतेतक्क सुथय् गुताः इलंनिसें सनिलया खुताः ईतक्क आवेदकतय्सं फारम जायेके फइगु जूगु दु । स्वनिगःपाखें फारम जायेकीपिं मनूतय्सं ग्लोबल बैंकय् २४ अमेरिकी डलर बुझय् यायेमाःगु व्यवस्था नं याःगु दु । फारम वितरणया नितिं किपुलिइ दुगु ल्याबरोटरी माध्यमिक विद्यालय, नेपाल वेद विद्याश्रम संस्कृत माध्यमिक विद्यालय वनकाली गौशाला व एन्फा टेक्निकल सेन्टर, च्यासः बालकुमारीइ व्यवस्था मिलय् यानातःगु जानकारी ब्यूगु दु ।
स्वनिगलं पिने धाःसा रुपन्देहीया बुटवल प्रदर्शनी मण्डपय् फाराम जायेकेगु व्यवस्था मिलय् यानातःगु श्रम लिसे यातायात व्यवस्था मन्त्रालय वैदेशिक रोजगार विभागं जानकारी ब्यूगु खः । रोजगारीया नितिं दक्षिण कोरिया वनीपिंत लक्षित यानाः आवेदन फाराम चायेकूगु थ्व स्वक्वःगु खुसिइ खः । वंगु दँ आवेदन फाराम सङ्कलननिसें परीक्षा सञ्चालनतक्कया फुक्क जिम्मा त्रिभुवन विश्वविद्यालयया दुसां नं थुगु दँ नेपाल सरकार थःम्हं हे काःगु खः ।
